(අනීෂා මානගේ)
ද්වි පුද්ගල ඝාතනයක් සඳහා සූදානම් වූ පුද්ගලයින් දෙදෙනෙකු අත්අඩංගුවට ගත් බෙලිඅත්ත පොලිසිය පවසයි.
ඔවුන් සතුව තිබි කඩු දෙකක්, යකඩ පට්ටමක් හා ත්‍රී රෝද රථයක් පොලිස් බාරයට ගෙන ඇත.
අත්අඩංගුවට ගනු ලැබූ සැකකරුවන් බෙලිඅත්ත විස්කම්පුර හා ඉසුරුපුර ප්‍රදේශයේ පදිංචිකරුවෝ වෙති.
දුරකථන ඇමතුමෙන් ලද තොරතුරු වලට අනුව එම ස්ථානයට පොලිස් නිලධාරින් ආසන්න වන විට ඝාතකයන් ඝාතනය සිදුකිරීමට සැලසුම් කළ නිවස අසල ත්‍රී රෝද රථයක් නවතා තිබී ඇති අතර පොලිස් ජිප් රථය දුටු සැනින් සැකකරුවන් සිව් දෙනෙකු ත්‍රීරෝද රථයේ නැගී පලා ගොස් තිබේ.
ත්‍රී රෝද රථයේ ඉදිරිපස පාපිස්නා යට තිබී අඩි තුන හමාරක් පමණ දිගැති කඩුවක්, අඩි දෙකහමාරක් පමණ දිගැති කඩුවක් හා විදේශීය රටක නිෂ්පාදිත ජීව අත්බෝම්බයක් සොයාගෙන ඇත.
අත්අඩංගුවට ගත් සැකකරුගෙන් කරන ලද ප්‍රශ්න කිරීම් වලදී පලාගිය සැකකරුවන් පිළිබදව තොරතුරු පවසා තිබේ. ඒ අනුව තවත් සැකකරුවෙක් බෙලිඅත්ත පුවක්දණ්ඩාව ප්‍රදේශයේදී අද (18) අත්අඩංගුවට ගෙන ඇත.
සිද්ධියට සම්බන්ධ ප්‍රධාන සැකකරුගේ පුද්ගලික ආරවුලක් හේතුවෙන් මෙම ද්විපුද්ගල ඝාතනය සිදුකිරීමට සැලසුම් කළ බවද එය සැලසුම් කළ ආකාරය පිළිබඳව අත්අඩංගුවට ගනු ලැබූ සැකකරුවන් දෙදෙනා පොලිසිය හමුවේ ප්‍රකාශ කර තිබේ.
