(විනීතා එම් ගමගේ)
පලාගල, මහහුරුල්ලෑව පුරාවිද්‍යා ස්මාරකය ඩෝසර් කිරීමේ සිද්ධිය පිළිබඳව සවිස්තර වාර්තාවක් ලබා දෙන ලෙස පුරා විද්‍යා නිලධාරින්ට උපදෙස් දුන් බව ජාතික උරුම, ප්‍රසාංග කලා හා ග්‍රාමිය කලා ශිල්පී ප්‍රවර්ධන කටයුතු රාජ්‍ය අමාත්‍ය විදුර වික්‍රමනායක මහතා අද (11) පැවැසීය.
එම පුරාවිද්‍යා රක්ෂිත ස්ථානයයේ පරික්ෂණයක් සඳහා පුරාවිද්‍යා දෙපාර්තමේන්තුවේ නිලධාරි කණ්ඩායමක් එහි යැවූ බව ද රාජ්‍ය අමාත්‍යවරයා කීය.
අනුරාධපුර දිස්ත්‍රික්කයේ, පලාගල ප්‍රාදේශීය ලේකම්ක කොට්ඨාසයේ ගල්කිරියාගම පොලිස් බල ප්‍රදේශයට අයත් මහ හුරුල්ලෑව පුරාවිද්‍යා ස්මාරක භූමිය ඉකුත් 8 වැනිදා යම් පිරිසක් විසින් ඩෝසර් කර විනාශ කර තිබිණි.
ඓතිහාසික පුරාවිද්‍යා භූමියක් ලෙස ගැසට් කර ඇති එම භූමියේ තිබු පැරණි ගල්කණු, සඳකඩ පහන ඇතුළු ඉපැරණි ස්මාරක හා ඉදිකිරීම් බොහොමයක් මෙහි දී විනාශ කර තිබු අතර ඒ පිළිබඳ ගත් පියවර කුමක් දැයි විමසීමේ දී වික්‍රමනායක මහතා මේ බව කියා සිටියේය.
