(රංජිත් රාජපක්ෂ)                        

තලවකැලේ පොලිස් වසමට අයත් සෙන්ක්ලොයාර් වතුයායේ ස්ටෙලින් කොටසේ වතු නිවාස පේළියක අද (19) පස්වරුවේ හටගත් ගින්නකින් වතු නිවාස 9 ක් සම්පූර්ණයෙන් ගිනිගෙන විනාශ වී ඇති බව තලවකැලේ පොලිසිය පවසයි.

මෙම වතු නිවාස පේළියේ නිවාස 24ක් ඇති බවත්,  සෙසු නිවාසවලට පැතිර ගිය ගින්න  වතු කම්කරුවන් සහ තලවකැලේ පොලිසියේ නිලධාරීන් එක් ව පාලනය කළ බවත් පොලිසිය කියයි.

ගින්නෙන් කිසිවෙකුටත් තුවාල සිදු වී නොමැත.

එක් නිවසකින් හට ගත් ගින්න සෙසු නිවාසවලට පැතිර ගිය බවත්, ගින්නට හේතුව මෙතෙක් අනාවරණය වී නොමැති බවත් පොලිසිය පවසයි.

ගින්නෙන් අවතැන් වූ පවුල් 9 කට අයත් සමාජිකයන් 25 දෙනෙකු තාවකාලිකව එම වතුයායේ පාසලේ නතර කර ඇති අතර ඔවුන්ට අවශ්‍යය පහසුකම් සැලසීමට වතු පාලන අධිකාරිය කටයුතු කර ඇත.

ගින්නෙන් වූ අලාභයද මෙතෙක් තක්සේරු කර නොමැත. තලවකැලේ පොලිසිය පරීක්ෂණ පවත්වයි.