(සිරංගිකා ලොකුකරවිට)
ගාල්ල දිස්ත්‍රික්කයේ පුරන් කුඹුරු අස්වැද්දීම සම්බන්ධව ප්‍රාදේශීය ගොවිජන සංවර්ධන නිලධාරීන්ගේ වාර්තා ලැබී නොමැති බව දකුණු පළාත් කෘෂිකර්ම අමාත්‍ය යූ. ජී. ඩී. ආරියතිලක මහතා පවසයි. ගාල්ල දිස්ත්‍රික් සම්බන්ධීකරණ කමිටුවේ දී ඒ මහතා මේ බව පැවසීය.
“පසුගිය කාලයේ ඇතිවූ නියං තත්ත්වයට මුහුණ දීම සඳහා වගා නොකරන ලද කුඹුරු ඉඩම් ගොවිජන සේවා දෙපාර්තමේන්තුව මගින් පවරාගෙන වගා කිරීමට කැමති පුද්ගලයන්ට දීමට තීරණය කළා. ඒත් ගාල්ල දිස්ත්‍රික්කයේ වගා නොකරන කුඹුරු ඉඩම් සම්බන්ධව තවමත් වාර්තාවක්වත් ලැබී නැහැ. දැනට ලබා දෙන්නේ දිස්ත්‍රික්කයේ පුරන් කුඹුරු සම්බන්ධ වාර්තාවක්. එය ප්‍රමාණවත් නැහැ.“
“කෘෂිකර්ම පර්යේෂණ නිලධාරී වසම් මට්ටමින් මේ වාර්තාව ලබාගැනීම අවශ්‍යයි. එවිට කුඹුරු වැඩ කරන තැන් සහ නොකරන තැන් බලාගත හැකියි. මේ වාර්තා සකස් කරන්න කියා ප්‍රාදේශීය කමිටු රැස්වීම්වලදීත් දැනුම්වත් කළා. ඒත් ප්‍රාදේශීය නිලධාරීන් ක්‍රියාත්මක වෙලා නැහැ.ගොවිජන සේවා දෙපාර්තමේන්තුවේ සහාය නැතිව අපිට ඉඩම් පවරාගැනීම සඳහා නීතිය ක්‍රියාත්මක කරන්න බැහැ. මාධ්‍යයත් අපෙන් නිතර මේ ගැන විමසනවා.අපිට දෙන්න උත්තර නැහැග“යැයි ඒ මහතා කීය
මේ සම්බන්ධව පිළිතුරු දෙමින් ගොවිජන සංවර්ධන සහකාර කොමසාරිස් ඩබ්ලිව්.කේ.විමලරත්න මහතා පැවසුවේ වැඩපිළිවෙලක් තවමත් සකස් කර නොමැති බවත් පුරන් කුඹුරු ප්‍රමාණය ඇතුළත් වාර්තාවක් සතියක් ඇතුලත ලබා දෙන බවත්ය.
