(පද්මා කුමාරී කංකානම්ගේ )
වනාත විල්ලුව අරුවක්කාඩුව ප්‍රදේශයේ ඉදිකිරීමට යෝජිත කසල බැහැර කිරීමේ ව්‍යාපෘතියට විරෝධය දැක්වීම පිණිස කල්පිටිය සියලු ආගමික නායකයින් ප්‍රමුඛ සිවිල් සංවිධාන එකතුව කල්පිටිය ප්‍රාදේශීය ලේකම් කාර්‍යාලය ඉදිරිපිට අඛණ්ඩ උපවාසයක් ආරම්භ කර ඇත.
කල්පිටිය ඒකාබද්ධ සිවිල් සංවිධාන එකතුවේ සභාපති සහ කල්පිටිය සංචාරක සංවිධානයේ ලේකම් අබ්දුල් මලික් මහතා පැවසූයේ දැනට ඉදිවෙමින් පවතින කසල අංගනය පිහිටා ඇත්තේ අරුවක්කාඩුවේ සිට කිලෝ මීටර 7ක් දුරින් පිහිටි සේරක්කුළියේ බවත් කල්පිටියේ සිට කළපුව ඔස්සේ සේරක්කුලියට කිලෝ මීටර තුනකට ආසන්න දුරක් පවතින බවත් ය.
ඒ හේතුවෙන් මෙම ව්‍යාපෘතියේ සියලු දුර්විපාක කල්පිටියේ කෘෂිකර්මාන්තයට ධීවර කර්මාන්තයට සහ සියලු ආර්ථික කටයුතු සඳහා බලපාන බව මලික් මහතා පවසයි.
අදාළ ව්‍යාපෘතිය මෙම ස්ථානයෙන් ඉවත් කර ගන්නා මෙන් රජයෙන් ඉල්ලා සිටින බව පවසන ඒ මහතා කල්පිටියේ සියලු පුරවැසියන්ගේ මානව හිමිකම් වෙනුවෙන් ජිනීවා මානව හිමිකම් කොමිසම දක්වා මෙම ගැටලුව රැගෙනයාමට ක්‍රියා කරන බව ද පැවසුවේ ය.
මෙම අවස්ථාවට ප්‍රදේශවාසී ජනතාව සහ සිවිල් සංවිධාන නියෝජිතවරු රැසක් සහභාගී වූහ.
