(රෝෂන් තුෂාර)
ජාතික ලොතරැයි මණ්ඩලයේ හිටපු අධ්‍යක්ෂවරයෙකු වන තුසිත හල්ලොලුව මහතාගේ වාහනයට පහරදී සහ වෙඩි තැබුවේ යැයි කියන සිද්ධිය සම්බන්ධයෙන් අත්අඩංගුවට ගෙන රක්ෂිත බන්ධනාගාර ගත කර සිටි තවත් සැකකරුවෙක් කොළඹ අතිරේක මහේස්ත්‍රාත් පසන් අමරසේන මහතා හමුවෙ රහස් ප්‍රකාශයක් අද(06) ලබා දුන්නේය.
සිද්ධිය සම්බන්ධයෙන් කොළඹ අපරාධ කොට්ඨාශය මගින් සැකකරුවන් හයදෙනකු අත්අඩංගුවට ගෙන අධිකරණයට ඉදිරිපත් කිරීමෙන් පසුව රක්ෂිත බන්ධනාගාර ගතකර ඇතිි අතර මොහොමඩ් පාරිස් නැමැති සැකකරු මෙසේ රහස් ප්‍රකාශය ලබා දුන්නේය.
මීට පෙරද එක් සැකකරුවකු රහස් ප්‍රකාශයක් ලබා දී තිබිණි.
සමිත මණ්ඩාර, මොහොමඩ් පාරිස් , සුරංගි උදේසිකා , රුවන් තුසිත, මොහොමඩ් සස්නි සහ මොහොමඩ් සෆ්රා සැකකරුවන් මෙසේ අධිකරණයට ඉදිරිපත් කිරීමෙන් පසුව රක්ෂිත බන්ධනාගාර ගත කර ඇත.
සිද්ධිය සම්බන්ධයෙන් කොළඹ අපරාධ කොට්ඨාසය විමර්ශන සිදු කරන අතර සැකකරුවන්ගේ බැංකු ගිණුම් විස්තර වාර්තා හා දුරකථන විශ්ලේෂණ වාර්තා කැඳවීමට අධිකරණය මගින් නියෝග ලබාගෙන ඇත.
සැකකරුවන් ලබන 12වැනි දින දක්වා රක්ෂිත බන්ධනාගාරගත කිරීමට නියෝග කර ඇති අතර ඊයේ රහස් ප්‍රකාශය ලබා දුන් සැකකරුද යළි එදින දක්වා රක්ෂිත බන්ධනාගාර ගත කිරීමට මහේස්ත්‍රාත්වරයා නියෝග කළේය.
