(පුෂ්පකුමාර ජයරත්න)
කුරුණෑගල දිසාවේ ප්රධාන පෙළේ රජයේ රෝහලක ප්රධාන වෛද්ය නිලධාරිවරයා තමන්ගෙන් ප්රතිකාර ලබා ගැනීමට පැමිණෙන කාන්තාවනට ලිංගික අපයෝජනයට ලක් කරන බවට වයඹ පළාත් සෞඛ්ය සේවා අධ්යක්ෂ කාර්යාලයට තොරතුරු ලැබී ඇතැයි වාර්තා වේ.
විශ්රාම යාමට තවත් වසරක කාලයක් ඉතිරිව සිටින මෙම වෛද්ය නිලධාරියා තමන් පරීක්ෂා කරන මුවාවෙන් ලිංගික අතවරයකට ලක් කළේ යැයි මාවතගම ප්රදේශයේ විවාහක කාන්තාවක පැමිණිල්ලක් කර ඇතැයි ද එම කාර්යාලය කියයි.
පවුල් ආරාවුලක් මත සැමියා කළ දීමක් හේතුවෙන් ප්රතිකාර සඳහා රෝහල්ගත වූ පැමිණිලිකාර කාන්තාව පරීක්ෂා කරන මුවාවෙන් එම වෛද්යවරයා ඇය අතවරයට ලක් කර ඇති බවද එම පැමිණිල්ලෙහි සඳහන්ය.
පරීක්ෂාවට ලක් කිරීමට පෙර මෙම වෛද්යවරයා පැය බාගයකට වැඩි කාලයක් විවිධ ලිංගික කරුණු සම්බන්ධයෙන් එම කාන්තාව සමඟ දුරකථන සංවාදය යෙදී ඇති අතර කාන්තාව එම සංවාදය තම ජංගම දුරකථනය මඟින් පටිගත කර එය තම සැමියාට ලබාදී ඇත.
රෝහලේදී මෙන්ම මෙම වෛද්යවරයා පවත්වාගෙන යන පෞද්ගලික ප්රතිකාර මධ්යස්ථානයකදීද ප්රතිකාර සඳහා පැමිණෙන කාන්තාවන් විශාල පිරිසක් මේවනවිට මොහුගේ අතවරයට ලක්ව ඇති බවද සමාජයට හෙළි වෙතැයි බියෙන් සහ ලැජ්ජාවෙන් ඔවුන් එම අතවර සිද්ධීන් සඟවාගෙන සිටින බවද වාර්තාවේ.
මෙම වෛද්යවරයාගෙන් රෝහල් කාර්ය මණ්ඩලයේ සිටින සේවිකාවන්ටද නිරන්තරයෙන්ම ලිංගික බලපෑම් එල්ල වන බවද රාජකාරි අවස්ථාවේදී පවා මත් න පුවක් වර්ගයක් සැපීමට පුරුදුව සිටින මොහු කාර්ය මණ්ඩල සාමාජිකාවන්ට පවා එම පුවක් සැපීමට බල කරන බවද වාර්තාවේ.
මෙම ලිංගික අපයෝජනයන්ට අමතරව රෝහල තුළ සිදු කරන ලද වංචනික ක්රියාවන් රැසකටද සම්බන්ධ බවට මොහුට එරෙහිව චෝදනා එල්ල වන බැවින් විධිමත් පරීක්ෂණයක් පැවැත්වෙන්නේ නම් ඒ සම්බන්ධයෙන් අවශ්ය සාක්ෂි ලබා දීමට එම රෝහලේ කාර්ය මණ්ඩලය සූදානමින් සිටින බවද දැනගන්නට ලැබේ.
