(සුජිත් හේවාජුලිගේ සහ අංජුල මහික වීරරත්න )
අපොස උසස් පෙළ, අපොස සාමාන්‍ය පෙළ සහ 5 ශ්‍රේණිය ශිෂ්‍යත්ව විභාගය පැවැත්වෙන දින වකවානු අධ්‍යාපන අමාත්‍ය සුසිල් ප්‍රේමජයන්ත මහතා පාර්ලිමේන්තුවේදී අද (5) ප්‍රකාශයට පත් කළේය.
ඔහු එම දින වකවානු ප්‍රකාශ කළේ කෑගලු දිස්ත්‍රික් මන්ත්‍රී උදයකාන්ත ගුණතිලක මහතා සභාව කල්තබන අවස්ථාවේදී යොමු කළ ප්‍රශ්නයකට පිළිතුරු දෙමිනි.
සුසිල් ප්‍රේමජයන්ත මහතා මෙසේද ප්‍රකාශ කළේය.
" පසුගිය උසස් පෙළ විභාගයේ ප්‍රතිඵල ලබන අගෝස්තු මාසයේදී නිකුත් කෙරෙනවා. මීළඟ උසස් පෙළ විභාගය ඒ ප්‍රතිඵල නිකුත් කර අඩු තරමින් මාස තුනකින් පසු බොහෝවිට නොවැම්බර් දෙසැම්බර් පැවැත්වීමට බලාපොරොත්තු වෙනවා. එසේම මේ වසරේදී පැවැත්විමට නියමිත 5 ශ්‍රේණිය ශිෂ්‍යත්ව විභාගය උසස් පෙළ ආරම්භ කිරීමට පෙරාතු දිනයක පවත්වීමට අපේක්ෂා කරනවා. මේ වසර අවසානයේ තිබෙන අපොස සාමාන්‍ය පෙළ විභාගය ලබන වසරේ පෙබරවාරි මාර්තු පැවැත්වීමට සැලසුම් කරලා තියෙනවා.
ප්‍රධාන විභාග දෙකක් අතර යම් කාල පරිච්ඡේදයක් අවශ්‍ය කටයුතු සැලසුම් කිරීම සඳහා විභාග දෙපාර්තමේන්තුවට ලබාදීම අවශ්‍යයි. අපොස උසස් පෙළ විභාගය පසු ගිය සැරේ පැවැත්වුණා. ඒ විභාගයේ ප්‍රතිඵල පරික්ෂා කිරීම අවසන් අදියරේ පවතිනවා.
කොවිඩ් තත්වය නිසා 2020- 21 වර්ෂවලදී බස්නාහිර පළාතේ පාසල් කාලය සියයට 50කින් පමණ අහිමි වුණා. පිට පළාත්වල එම කාලයේදී අහිමිවුණු පාසල් කාලය සියයට හතළිහකි.
