(ටී.කේ.ජී.කපිල )
රුපියල් කෝටියක් පමණ වටිනා " හොන්ඩා ඩියෝ " වර්ගයේ යතුරු පැදි 15 ක් සොරකම් කර , අලෙවි කර ඇති පුද්ගලයෙකු කටුනායක , වලානගොඩ නේවාසිකාගාරයක සිටියදී කටුනායක පොලීසියේ අපරාධ විමර්ශන අංශයේ නිලධාරීන් පිරිසක් විසින් අත් අඩංගුවට ගෙන තිබේ .
මොහු කුරුණෑගල ප්‍රදේශයේ පදිංචි 24 හැවිරිදි තරුණයෙකු වන අතර ඔහු විසින් " හොන්ඩා ඩියෝ " වර්ගයේ යතුරු පැදි පමණක් සොරකම් කිරීම විශේෂත්වයක් බව පොලීසිය පවසයි .
ඔහු කුරුණෑගල , පොතුහැර , වරකාපොල , පොල්ගහවෙල , නිට්ටඹුව වැලිවේරිය , වේයන්ගොඩ , පෑලියගොඩ සහ ජා - ඇල යන ප්‍රදේශ වල අනාරක්ෂිතව නවතා ඇති " හොන්ඩා ඩියෝ " වර්ගයේ යතුරු පැදි පමණක් තෝරා ගෙන සොරකම් කර තිබේ .
මෙසේ සොරා ගන්නා ලද යතුරු පැදි නිට්ටඹුව , පස්යාල ප්‍රදේශයේ ව්‍යාපාරිකයෙකුට , එක යතුරු පැදියක් රුපියල් 20, 000 ක් වැනි මිළකට අලෙවි කර ඇති බව ද පොලීසිය විසින් කරන ලද මූලික විමර්ශන වලදී අනාවරණය කර ගෙන තිබේ .
මෙම අත් අඩංගුවට ගැනීම සහ මේ පිළිබඳව වැඩිදුර විමර්ශන කටයුතු මීගමුව ජ්‍යෙෂ්ඨ පොලිස් අධිකාරී සමන් සිගේරා මහතාගේ උපදෙස් පරිදි , කටුනායක ප්‍රදේශය භාර සහකාර පොලිස් අධිකාරී එරික් පෙරේරා මහතාගේ සහ කටුනායක පොලීසියේ ස්ථානාධිපති , ප්‍රධාන පොලිස් පරීක්ෂක අකිල රණසිංහ මහතාගේ අධීක්ෂණය යටතේ , අපරාධ විමර්ශන අංශයේ ස්ථානාධිපති පොලිස් පරීක්ෂක නුවන් තාරක , උප පොලිස් පරීක්ෂක මාරසිංහ පොලිස් සැරයන්වරුන් වන 37371 සුනිල් , 13860 සූරියබණ්ඩාර යන නිලධාරී මහත්වරුන් විසින් සිදු කරමින් සිටිති .
කටුනායක පොලීසිය මගින් අත් අඩංගුවට ගත් මෙම පුද්ගලයා සහ ඔහු විසින් සොරකම් කරන ලද යතුරු පැදි අද(20) මිනුවන්ගොඩ මහේස්ත්‍රාත් අධිකරණය වෙත ඉදිරිපත් කිරීමට නියමිතය .
