(අජිත්ලාල් ශාන්තඋදය සහ ජයන්ත නානායක්කාර)
යල් කන්නයේ පොහොර ලබාදෙන බවට ලදුපත් නිකුත් කර මාස දෙකක් ගතවී ඇතත් පොහොර ලබා නොදීම සම්බන්ධයෙන් විරෝධය දක්වමින් ගොවීහු අද (29) පනාමුර ගොවිජන සේවා මධ්‍යස්ථානය ඉදිරිපිට විරෝධතාවක නිරත වුහ.
විරෝධතාවේ නිරත ගොවීන් කිහිපදෙනෙක් පසුව එහි වහලයට නැග ද විරෝධතාවේ යෙදුණි.
අලූත්වැව, තෝරකොළයායල මඩපළාත යන ප‍්‍රදේශවල ගොවීන් හැටක් පමණ විරෝධතාවට එක්ව සිටියහ.
ඔවුන් ගොවි සංවිධාන කිහිපයක සාමාජික සාමාජිකාවෝ වූහ. මැයි මාසයේ පෝර ලබාදෙන බව පවසමින් අප්‍රේල් 30 වන දින පොහොර ලබාගැනීමට රිසිට් පත් ද ගොවීන් වෙත නිකුත් කළ බව විරෝධතාවට එක්ව සිටි පිරිස කීහ.
එහෙත් සංචරණ සීමා ඇතැයි පවසමින් මාස දෙකකට ආසන්න කාලයක් තිස්සේ පනාමුර ගොවිජන සේවා කාර්යාලයේ සංවර්ධන නිලධාරිනිය එහි නොපැමිණි බවට ද ඔවුන් චෝදනා කළේය.
තමන්ට පොහොර නැතත් තම ගමේම පිරිසක් වැඩි මිලට ගොවිජන සේවා මධ්‍යස්ථානය හරහා පොහොර ලබාගත් බව ද කී අසල්වැසියන් පාවාදිය නොහැකි නිසා එසේ වැඩිමිලට පොහොරගත් අය හෙළි කළ නොහැකි බව ද විරෝධතාවට එක්ව සිටි පිරිස් කීහ.
තමන්ගේ ගොයම් දැන් මාසයකට අධික වයසක් ඇති බවත් අත්‍යවශ්‍ය වෙලාවේ දෙනවා යැයි කී පොහොර ටිකත් නොදෙන්නේ ඇයිදැයි විරෝධතාකරුවෝ ප‍්‍රශ්න කළහ. විරෝධතාව පැවති ස්ථානයට පැමිණි පොලිස් නිලධාරීයෙක් දුරකතන මාර්ගයෙන් පනාමුර ගොවිජන සංවර්ධන නිලධාරිනියට ඇමතුමක් ගෙන උද්ගතව ඇති තත්ත්වය පැහැදිලි කලේය.
තිඹොල්කැටිය ගබඩාවේ පොහොර ඇති බවත් එතැනින් හෝ තමන්ට පොහොර ගෙනවිත් බෙදා දෙන ලෙසත් විරෝධතාකරුවෝ ඇගෙන් ඉල්ලා සිටියහ. එහෙත් ඇගෙන් ඊට ප‍්‍රතිචාර නොලැබුණු බවද විරෝධතාකරුවෝ කීහ.
