( +++ ඉන්දිකා රාමනායක)
අපරාධ පරීක්ෂණ දෙපාර්තමේන්තුවේ සමූහ මංකොල්ල විමර්ශන අංශයේ හිටපු ස්ථානාධිපති පොලිස් පරීක්ෂක නිශාන්ත සිල්වා මහතා පොලිස් දෙපාර්තමේන්තුවෙන් අවසර නොගෙන ස්විට්සර්ලන්තයට පැනයාමේ සිද්ධිය සම්බන්ධයෙන් පොලිස් මූලස්ථානය විශේෂ විමර්ශනයක් ආරම්භ කර ඇත.
නිශාන්ත ද සිල්වා මහතා ස්විට්සර්ලන්තයට පලායාමට ප්රථම ඔහුගේ නිල නිවස, නිල රථය, ගිනි අවිය අපරාධ පරීක්ෂණ දෙපාර්තමේන්තුවට බාරදී නිවාඩු ද අනුමත කරගෙන ඇති බවත් ඒ ගැන පියවරක් නොගත්තේ ඇයිද යන්න හෙළිකර ගැනීම සඳහා මෙම පරීක්ෂණ ආරම්භ කර ඇති බවත් උසස් පොලිස් නිලධාරියෙක් කීය.
නිශාන්ත ද සිල්වා මහතා, ස්විට්සර්ලන්තයට පලායාම පිළිබඳව අපරාධ පරීක්ෂණ දෙපාර්තමේන්තුවේ ඇතැම් උසස් නිලධාරීන් මෙන්ම එහි පාලන අංශය, ප්රවාහන අංශය ද වගකිවයුතු බව එම උසස් නිලධාරියා කියාසිටියේය.
නිශාන්ත සිල්වා මහතාගේ ආරක්ෂාව වෙනුවෙන් ගිනිඅවි සහිත පොලිස් නිලධාරීන් කිහිප දෙනකු යොදවා ඇති බවත් ඔවුන් මේ සම්බන්ධයෙන් නිහඬව සිටීමද ගැටලුවක් බවත් එම උසස් පොලිස් නිලධාරියා සඳහන් කළේය.
මෙම සිද්ධිය සම්බන්ධයෙන් පරීක්ෂණ පවත්වන පොලිස් විශේෂ විමර්ශන ඒකකය, අපරාධ පරීක්ෂණ දෙපාර්තමේන්තුවේ හිටපු අධ්යක්ෂ ශානි අබේසේකර, හිටපු සහකාර පොලිස් අධිකාරි තිසේරා, ඇතුළු පොලිස් නිලධාරීන්ගෙන් ප්රකාශ සටහන් කරගෙන ඇති බවත්, තවත් නිලධාරීන් කිහිප දෙනකුගෙන් ප්රකාශ සටහන් කරගැනීමට නියමිතව ඇති බවත් පොලිස් ආරංචි මාර්ග වැඩිදුරටත් පවසයි.
