(සුජිත් හේවාජුලිගේ)
පාර්ලිමේන්තුවේ කුස්සිය ඉතාම අපිරිසුදු නරකාදියක් බව මහජන සෞඛ්‍ය පරීක්ෂකවරුන්ගේ වාර්තාවෙන් තහවුරු වීමෙන් පසු තමන් ඉන් සලාද කෑම පවා නැවැත්වූ බව කතානායක වෛද්‍ය ජගත් වික්‍රමරත්න මහතා පැවසීය.
මේ වාර්තාව දැක මන්ත්‍රීවරුන්ගේ ද බඩ දඟලන්නට ඇතැයි තමා සිතන බව පැවසූ කතානායකවරයා සමහර ආහාර මිනිස් පරිභෝජනයට නුසුදුසු රසකාරක යොදා සකස් කර තිබූ බවට තහවුරු වූයේ යැයිද ප්‍රකාශ කළේය.
" අපි ඉන්නේ මේ වගේ රටක" යැයිද ඔහු කීවේය.
කතානායකවරයා මෙසේ පැවසුවේ පොළොන්නරුවේ සහ කදුරුවෙල ආහාර නිෂ්පාදනය ආයතන ශ්‍රේණිගත කිරීම සම්බන්ධයෙන් පොළොන්නරුවේ පැවැති වැඩසටහනකදීය.
පාර්ලිමේන්තුව ආරම්භ වූ දා සිට මේ දක්වාම වසර හතළිහකින් එහි මුළුතැන්ගය පරීක්ෂාවට ලක්වී නොතිබූ බවත් තමා පසුගිය අප්‍රේල් මාසයේදී මහජන පරීක්ෂකවරුන් යොදවා පරීක්ෂා කළ අවස්ථාවේදී එහි අපිරිසුදු තත් වය හොඳින්ම දැකගත හැකි වූ බවත්
ඔහු ප්‍රකාශ කළේය.
මහජන සෞඛ්‍ය පරීක්ෂකවරුන්ට පාර්ලිමේන්තු කුස්සිය පරීක්ෂා කිරීමට කිසිම දිනක අවස්ථාව සලසා දී නොතිබුණු බවද එතන වෙනම අධිරාජ්‍යයක් බවද වික්‍රමරත්න මහතා පැවසීය.
මහජන පරීක්ෂකවරුන් තමාට පාර්ලිමේන්තු මුළුතැන්ගෙය සම්බන්ධයෙන් වාර්තාවක් දුන් බව පැවසූ කතානායකවරයා එම වාර්තාව තමා පාර්ලිමේන්තු ගෘහකාරක සභාවට පසුගියදා ඉදිරිපත් කළ බවද ප්‍රකාශ කළේය
උත්තරීතර පාර්ලිමේන්තුවේ තුනෙන් දෙකෙන් පනතක් සම්මත කරන වෙලාවේ මන්ත්‍රීවරුන් මේවා කාලා බඩේ අමාරුව හැදුණොත් බරපතළ ප්‍රශ්නයක් මතුවන බවද කතානායකවරයා පැවසීය
පාර්ලිමේන්තුවේ මුළුතැන්ගෙයි මීයන් කැරපොත්තන් දුවපු සලකුණු පවා හමුවූ බවත් සමහර හට්ටි වලං කළු පාටට ජරාව බැඳී ඉතා අපිරිසිදු තත්ත්වයේ තිබූ බවත් ඔහු කීවේය.
සමහර භාජන තැලී පොඩිවී නැවී තිබූ බවත් මුළුතැන්ගෙයි බිම පවාකැඩී ගොස් තිබූ බවත් කතානායකවරයා කීය.
මේවා කතා කරනකොට නිලධාරින් අමනාපවී පී.එච්.අයි කියා අපහාස කරමින් තමාට එරෙහිව විවිධ අයුරින් ද්‍රෝහීකම් කරන බවද සඳහන් කළේය.
" අපි දැන් විශේෂ කමිටු පත් කරලා මේ තත්වය නැති කරන්න කටයුතු කරගෙන යනවා" යැයි කතානායකවරයා වැඩිදුරටත් පැවසීය.
