(සුජිත් හේවාජුලිගේ සහ අංජුල මහික විරරත්න)
අමාත්යාංශයට නොදන්වා විදේශ ගතවූ විශේෂඥ වෛද්යවරුන් 83 දෙනකු සම්බන්ධයෙන් සේවය අතහැර යෑමේ නිවේදන (v.o.p) නිකුත් කර ඇතැයි සෞඛ්ය අමාත්යාංශයේ අධ්යක්ෂ (තෘතීක සත්කාර සේවා) වෛද්ය ප්රියන්ත අතපත්තු මහතා මහතා රාජ්ය ගිණුම් පිළිබඳ පාර්ලිමේන්තු කාරක සභාවේදී (කෝපා කමිටුව) පැවසීය.
මේ අතර පුහුණුවීම් සහ වෙනත් අවශ්යතා සදහා විදේශයන්ට ගොස් නැවත සේවයට වාර්තා නොකළ විශේෂඥ වෛද්යවරුන් 35 දෙනකු අසාදු ලේඛනයට ඇතුළත් කර ඇති බව පැවසූ අධ්යක්ෂවරයා විදේශ පුහුණුවෙන් පසු මාණ්ඩලික සහතිකය ලබා විශේෂඥ වෛද්යවරයකු බවට මෑතදී පත්වුණු 250 දෙනකුගෙන් 50 දෙනකු රැකියා සඳහා විදේශ ගතව ඇතැයිද සදහන් කළේය.
මෙසේ විදේශ ගතවන අය බැඳුම්කරය ගෙවා යා යුතු බවත් නොදන්වා ගියපු අයගෙන් බැඳුම්කරය අයකර ගැනීමට කටයුතු කරගෙන යන බවත් ප්රියන්ත අතපත්තු මහතා පැවසීය
මෙසේ විදේශගතවූ වෛද්යවරුන්ට නැවත පැමිණීමට ලිපියක් නිකුත් කරන බවත් එම ලිපිය නිකුත් කර මාසයකදී නොපැමිණියහොත් සේවය අතහැර යෑමේ නියෝගය නිකුත් කරන බවත් ඔහු කීවේය.
සෞඛ්ය අමාත්යාංශයේ කාර්ය සාධනය විමසීම සඳහා රාජ්ය ගිණුම් පිළිබඳ පාර්ලිමේන්තු කාරක සභාව එහි සභාපති රාජ්ය අමාත්ය ලසන්ත අලගියවන්න මහතාගේ ප්රධානත්වයෙන් පාර්ලිමේන්තු සංකීර්ණයේදී පසුගියදා රැස්විය. මේ පිළිබඳ තොරතුරු අනාවරණය වූයේ එම රැස්වීමේදීය.
මේ අතර වෛද්යවරුන් 677 දෙනකු මේ වසරේ මැයි මස 31 වනවිට විදේශ පුහුණුවට ගොස් සිටි බවත් ඒ අය ඉදිරි වසර දෙකේදී නැවත පැමිණිය යුතු බවත් ඔහු සදහන් කළේය.
මේ සම්බන්ධයෙන් අදහස් දැක්වූ සෞඛ්ය සේවා අධ්යක්ෂ ජනරාල් වෛද්ය අසේල ගුණවර්ධන මහතා පැවසුවේ "මේ අය එනකම් කියන්න බැහැ" යනුවෙනි.
මේ විශේෂඥ වෛද්යවරුන් නොපැමිණියහොත් කුඩා රෝහල්වලට බලපෑමක් ඇතිවිය හැකි බවත් මේ ගැන පුළුල්ව සාකච්ඡා කළ යුතු බවත් ඔහු සදහන් කළේය.
වෛද්යවරුන් තවත් 612ක් පුහුණුවීම් සඳහා විදේශගතවීමට සූදානම් වෙමින් සිටින බවද ගුණවර්ධන මහතා පැවසුවේය.
වෛද්යවරුන් ඇත්තටම විදේශගත වන්නේ ආර්ථික අර්බුද නිසා බවත් දරුවන්ගේ ඉගෙනීම් සඳහා මුදල් සොයා ගැනීමද තවත් බලාපොරොත්තුවක් බවත් සෞඛ්ය සේවා අධ්යක්ෂ ජනරාල්වරයා කීවේය.
ගිවිසුම අනුව යළි මෙරටට නොපැමිණියහොත් පුහුණුවට ගිය මුළු වියදමවූ එක් කෝටි පනස් ලක්ෂයක මුදල අයකර ගැනීමට කටයුතු කරන බව සෞඛ්ය අංශ ප්රධානීහු පැවසූහ.
මේ අතර වෛද්යවරුන් තුන් සියයක් මේ වසරේ විදේශගතවී ඇති බවත් විදේශගතවන විශේෂඥ වෛද්යවරුන්ගෙන් කොටසක් යළි සේවයට නොඑන බවත් නියෝජ්ය සෞඛ්ය සේවා අධ්යක්ෂ ජනරාල් වෛද්ය ජේ. විජේසුරිය මහතා එහිදී පැවසීය.
විශේෂඥ වෛද්යවරුන් 2799ක් සිටිය යුතු වුවත් දැනට සිටින්නේ 2148 දෙනකු පමණක් බවත් 651 කෙනකුගේ අඩුවක් පවතින බවත් ඔහු කීවේය.
