(ප්‍රසාද් රුක්මල්)
ඇල්ල කරදගොල්ල මලිත්තගොල්ල ප්‍රදේශයේ නායයාම යලි සක්‍රිය වීමට පටන් ගෙන ඇතයි ආපදා කළමනාකරණ මධ්‍යස්ථානය අද (12) පැවසීය .
මීට පෙර මාස කීපයකට ඉහතදී කරදගොල්ල මලිත්තගොල්ල ප්‍රදේශයේ නායයාමට පටන් ගත් බවත් පසුව එය ක්‍රමයෙන් අවම වී යලි පවතින වර්ශාවත් සමග මෙසේ නායයාම සක්‍රිය වීමට පටන් ගෙන ඇති බවත් ඇල්ල ප්‍රාදේශීය ලේකම් ඉංදික ගයාන් පතිරණ මහතා සදහන් කලේය.
විශේෂයෙන් මේ සිංහල හින්දු අලුත් අවුරුද්දට විශාල පිරිසක් නෑගම් සහ විනෝද චාරිකා යාමට මෙම ඇල්ල වැල්ලවාය ප්‍රධාන මාර්ගය භාවිතා කරන බවත් මෙම මලිත්තගොල්ල ප්‍රදේශයේ නායයාම යලි සක්‍රිය වීමත් සමග විශාල අනතුරුදායක තත්ත්වයක් උදා වී තිබෙන හෙයින් ජනතාවට රථ වාහන රියැදුරන්ට දැඩි විමසිල්ලෙන් කල්පනාකාරිව ආරක්ශිතව අවධානයෙන් මෙම මාර්ගයේ ගමන් කරන ලෙසට දැනුම් දෙයි .
කරදගොල්ල මලිත්තගොල්ල ප්‍රදේශයේ නායයාම සක්‍රිය වීමට පටන් ගත් ස්ථානයේ ජල පහරක් ගලා යමින් පවතින අතර, මේ සම්බන්ධයෙන් ජාතික ගොඩනැගිලි පර්යේෂණ ආයතනයට අදාළ පරීක්ෂණ කටයුතු සිදු කරන ලෙසට දැනුම් දී තිබෙන බවත් ආපදා කළමනාකරණ මධ්‍යස්ථානය පවසයි .
