(බී.ජී.චතුරංග )
අනුරාධපුර බන්ධනාගාරයේ රඳවා සිටින රැඳවියෙකු කිඹුල් ප්රහාරයකට ලක්ව, එම කිඹුලා විසින් ඇද ගෙන යන අවස්ථාවේදී දැඩි පරිශ්රමයක් යොදා කිඹුලාගෙන් බේරී ඇති අතර දැඩි ලෙස තුවාල ලැබූ එම රැඳවියා අනුරාධපුර ශික්ෂණ රෝහලට ඇතුළත් කිරීමෙන් අනතුරුව ශල්ය කර්මයකට භාජනය කර ඇති බව වාර්තා වේ.
මෙලෙස කිඹුල් ප්රහාරයට ලක්ව ඇත්තේ, අනුරාධපුර බන්ධනාගාරයේ, එලි මහන් සිර කඳවුරේ රඳවා සිටි 34 හැවිරිදි දමිල ජාතික රැදවියෙකි..
මෙම රඳවියා ඇතුළු පිරිසක් බන්ධනාගාර භූමියේ මල්වතු ඔයට යාබදව ඊයේ (22) රාත්රී වගා කටයුතු වල නිරත වෙමින් සිටියදී, උණ පඳුරක් ආසන්නයේ සැඟව සිටි කිඹුලෙකු මෙම සිරකරුගේ කකුලෙන් අල්ලා මල්වතු ඔයට ඇද ගෙන ගොස් ඇති බව බන්ධනාගාර නිලධාරියකු පැවසීය.
කිඹුල් ප්රහාරයට ලක්වූ එම රැඳවියාගේ එක් අතකට, කකුලකට සහ ගෙල ප්රදේශයට තුවාල සිදුව ඇති අතර එම තුවාලකරු අනුරාධපුර ශික්ෂණ රෝහලේ 11 වන වාට්ටුවට ඇතුලත් කිරීමෙන් අනතුරුව අද (23දා) උදෑසන ශෛල්ය කර්මයකට භාජනය කෙරිණි.
එම රැඳවියා මල් අතු ඔයේ දියේ නාමින් සිටියදී මෙම කිඹුල් ප්රහාරයට ලක්වූ බවට ලැබුණු තොරතුරකට අනුව ඒ සම්බන්ධයෙන් අප කල විමසීමකදී උසස් බන්ධනාගාර නිලධාරියකු එය ප්රතික්ෂේප කල අතර එම සිර කඳවුරේ වගා කටයුතු කරමින් සිටියදී ඊයේ රාත්රී එම කිඹුල් ප්රහාරය එල්ල වූ බවද සඳහන් කලේය.
