(අංජුල මහික වීරරත්න)
කොහුවල ගුවන් පාලමේ ඉතිරි වැඩ නිම කිරීම සහ ගැටඹේ ගුවන් පාලම ඉදිකිරීමේ වැඩ කටයුතු යළි ආරම්භ කිරීමට කැබිනට් අනුමැතිය ලැබී ඇත.
හංගේරියානු රජය සමග ශ්‍රී ලංකාව විසින් අත්සන් තබා ඇති මූල්‍ය සහයෝගිතාව සඳහා වන රාමුගත ගිවිසුම යටතේ ලැඛෙන අරමුදල් මඟින් කොහුවල සහ ගැටඹේ ගුවන් පාලම් ඉදිකිරීමේ ව්‍යාපෘතිය ක්‍රියාත්මක කරනු ලැබ ඇත.
එවකට පැවති ආර්ථික අර්බුද තත්ත්වය හේතුවෙන්, හංගේරියාවේ එක්සිම් බැංකුව විසින් අරමුදල් සැපයීම අත්හිටු වීමෙන් අනතුරුව, කොන්ත්‍රාත්කරුගේ අරමුදල් යටතේ කොහුවල ගුවන් පාලම ඉදිකිරීමේ කටයුතු අවසන් කර රථවාහන ගමනාගමනය සඳහා මේ වන විට විවෘත කර තිබේ.
එසේ වුවද, බිම් මට්ටමේ මාර්ග නිම කර නොමැති බැවින් පදිකයන්ට දුෂ්කරතා වලට මුහුණ පෑමට සිදුව ඇත. එසේම, ගැටඹේ ගුවන් පාලමේ ඉදිකිරීම් කටයුතු ද අත්හිට වූ තත්ත්වයෙන්ම තවදුරටත් පවතී.
ඒ අනුව, වත්මන් කොන්ත්‍රාත්කරු හරහා දේශීය අරමුදල් යොදා ගනිමින්, කොහුවල ගුවන් පාලමේ නිම කර නොමැති බිම මට්ටමේ මාර්ග සම්පුර්ණ කිරීමටත්, ගැටඹේ ගුවන් පාලමේ ඉදිකිරීම් කටයුතු නැවත ආරම්භ කිරීමටත් ප්‍රවාහන මහාමාර්ග හා සිවිල් ගුවන් සේවා අමාත්‍යවරයා ඉදිරිපත් කළ යෝජනාව අමාත්‍ය මණ්ඩලය විසින් අනුමත කරන ලදී.
