(ඩී.ජී.සුගතපාල)

පොලිසිය දෙවතාවක්ම කළ අවවාද නොසළකා හැර නිරෝධායන සෞඛ්‍ය නිති රිති උල්ලංඝණය කරමින් මුව ආවරණ සහ අත් වැසුම් නොමැතිව කෙටි ආහාර පිළියෙළ කළ හෝටල් සේවකයන් දෙදෙනකු 19 වැනි දින දක්වා රිමාන්ඩ් බාරයේ තැබීමට ගාල්ල අතිරේක මහේස්ත්‍රාත් පවිත්‍රා සංජිවනී පතිරණ මහත්මිය ඊයේ (10) නියෝග කළාය.

මෙසේ රිමාන්ඩ් බන්ධනාගාර ගත කරනු ලැබුවේ ගාල්ල දෙවට ග්ලෝබල් හෝටලයේ ජමාල් අබ්දුල් මලාඩ් මෙහොමඩ් පිරිදවුස් (39) සහ මොහොමඩ් අරූස් මොහොමඩ් ජමිල්(30) නමැති සේවකයන් දෙදෙනෙකි.

නිරෝධායන සහ රෝග වැළැක්විමේ ආඥා පනත යටතේ සැකකරුවන් අධිකරණයට ඉදිරිපත් කරමින් පොලිසිය කියා සිටියේ මෙයට පෙර දෙවතාවක්ම මෙම සැකකරුවන්ට අවවාද කර ඇති අතර ඔවුන් ඒවා නොසළකා කටයුතු කර ඇති බවය.  2020 ඔක්තෝබර් 15 නිකුත් කර ඇති ගැසට් පත්‍රයේ  සඳහන් කොන්දේසි කඩකරමින් නිරෝධායන ව්‍යවස්ථාවට  අකිකරුවි සැකකරුවන් කටයුතු කර ඇති බවද පොලිසිය අධිකණය හමුවේ කියා සිටියේය.