(දඹුල්ල කාංචන කුමාර ආරියදාස)
දඹුල්ල ප්‍රාදේශීය සභාවට තරග වැදුණු එක්සත් ජාතික පක්ෂ ආධාරකරුවන් හා ශ්‍රී ලංකා පොදුජන පෙරමුණේ ආධාරකරුවන් අතර ගැටුමකින් පුද්ගලයන් 4 දෙනෙකු තුවාල ලබා පස් දෙනෙක් අත්අඩංගුවට ගෙන ඇතැයි සීගිරිය පොලිසිය කියයි.
දඹුල්ල ප්‍රාදේශීය සභාව සඳහා තරග වැදී පරාජය වී සිටින එක්සත් ජාතික පාක්ෂිකයන් සහ ශ්‍රී ලංකා පොදුජන පෙරමුණේ ආධාරකරුවන් දෙපිරිසක් අතර සීගිරිය ප්‍රදේශයේ දී 11 දින පස්වරුවේ එක ගැටුමක් හටගෙන තිබේ. එයින් එක්සත් ජාතික පක්ෂ ආධාරකරුවෙකු සහ ශ්‍රී ලංකා පොදුජන පෙරමුණේ ආධාරකරුවන් දෙදෙනකු තුවාල ලබා සීගිරිය ග්‍රාමීය රෝහලට ඇතුළත් කර සිටිති.
මෙසේ ගැටුමට සම්බන්ධ වූ පුද්ගලයන් පස්දෙනෙකු සැකපිට අත්අඩංගුවට ගත් බවත් ඔවුන් මහනුවර ප්‍රදේශයේ පදිංචිකරුවන් වන බවත් සීගිරිය පොලිසිය කියයි.
මීට අමතරව නිකවටවන ප්‍රදේශයේදී ශ්‍රී පොදුජන පෙරමුණේ ආධාරකරුවෙකුට එක්සත් ජාතික පක්ෂ ආධාරකරුවෙකු පහරදුන් බව පවසමින් පුද්ගලයෙකු දඹුල්ල රෝහලේ ප්‍රතිකාර ලබමින් සිටියි. ඔහු වෛද්‍ය පරීක්ෂණ සඳහා මහනුවර මහ රෝහලට මාරු කර යැවීමට නියමිත බව දඹුල්ල රෝහලේ ප්‍රකාශකයකු පැවසීය.
දඹුල්ල ප්‍රාදේශීය සභා බල ප්‍රදේශයේ තවත් ස්ථාන කිහිපයකම සුළු සුළු ගැටුම්කාරී තත්ත්වයන් කිහිපයක් වාර්තා වී ඇතත් ඒවා එම ස්ථානවලම සමථයකට පත් වූ බව පොලීසිය සඳහන් කළේය. පහර දීමට සැකපිට අත්අඩංගුවට ගත් පුද්ගලයන් දඹුල්ල මහේස්ත්‍රාත් අධිකරණයට ඉදිරිපත් කිරීමට නියමිත බව සීගිරිය පොලිසිය කියයි.
