කොළඹ මහනුවර මාර්ගයේ බැලුම්මහරදී හමුදා ජිප් රියක වහළය මත නැගුණු හමුදා නිලධරයකු කොළඹ මහනුවර පාර අවහිර කරගෙන සිටි ජනතාව ඇමැතීය.

මිනිත්තු පහක් යන්නට පෙර පාරෙන් ඉවත් වන්නැයි අණ කළේය.

එසේ ඉවත් නොවුවහොත් පහර දෙන බව කීවේය.

මාධ්‍යවේදීනට ද ඔහු පැවසුවේ ඡායාරූප ගැනීම හෝ වීඩියෝ නොකරන ලෙසයි.

එසේ කළහොත් ඔවුනට ද ප්‍රතිවිපාකවලට මුහුණ දීමට සිදුවන බව ද කීවේය.

රැස්ව සිටි මිනිසුන් එවිට පැවසුවේ ‘අනේ සර් එහෙම කරන්න එපා. අපි ඉල්ලන්නේ බීමට වතුර. අපට ලොකු ප්‍රශ්නයක් තිබෙනවා.‘ යනුවෙනි.

ඒ සමගම රැස්ව සිටි පිරිසට පොලු මුගුරුවලින් පහර වැදිණි. ඇතැමෙක් පහර කමින් දිවූහ.

ඇතැමෙක් සැඟවීමට තැන් සෙවූහ. කාන්තාවෝ ද පහර කෑමට ලක්වූහ. තවත් මිනිත්තු කිහිපයකින් පාරේ අවහිරය මහ හැරිණි. යුද හමුදාවේ සියයක් පමණ පාර දෙපස රැඳී සිටිති.

ආරක්ෂාව පතා ගෙවල්වලට ගිය අයද සොය සොයා පහර එල්ල කළ බව සිද්ධිය සියැසින් දුටුවෝ කියති.