2015 නව වසරේ සඳැල්ල මුල්ම කවරයේ ඡායාරූපය සඳහා පෙනී සිටින ඇය ”මලක් වැනි සඳකි” මේ සුරූපිනියගේ නාමයෙහි තේරුම අරුත් ගැන් වෙන්නේ එලෙසිනි. එනම් ”පුෂ්පිකා සඳමාලි” යන්නෙහි තේරුම වන්නේ එයයි. මලක් වැනි ලස්සන, සඳක එළිය විහිදුවන මේ පුෂ්පිකා සඳමාලි කවුද?
2010 දෙරණ වීට් මිස් ශ්රී ලංකා රූ-රැජින වූ පුෂ්පිකා 2011 ශ්රී ලංකා රූ-රැුජින වී ලෝක රූ-රැජින තරගය නියෝජනය කළාය. ඒ 2011 ලන්ඩනයේදී පැවැති ලෝක රූ-රැුජින තරගාවලියේදීය. ඒහිදී බියුටි විත් ද පර්පස් අංශයේ අවසන් 30 දෙනාට ඇතුළත්ව 24 වැනි ස්ථානය ලබා ගත්තාය. ඒ 138ක් පමණ වූ ලෝක රූ-රැජිනියන් අතරිනි. ඉන්පසුව 2011 දී චීනයේ පැවැත්වූ ලෝක සංචාරක රූ-රැජිණ තරගයට ද ඇය ඉදිරිපත් වූවාය. එහිදී හොඳම ජාතික ඇඳුම සඳහා වූ අංශයෙන් ජයග්රහණය ලැබූ ඇය, අවසන් 20 දෙනා අතරට ඇතුළත්ව එහි 13 වැනි ස්ථානය ලබා ගත්තාය. එතැනින්ද නොනැවතුණ ඇය ඉන්පසුව ඊජිප්තුවේ පැවැත්වූ ලෝකයේ හොඳම නිරූපිකාව තරගය වෙනුවෙන්ද ශ්රී ලංකාව නියෝජනය කළාය. ඒ සුරූපී පුෂ්පිකා සඳමාලි අද මොනවද කරන්නෙ? හෙට මොනවගේ දෙයක් කිරීමටද සූදානම් වන්නේ? සුන්දර පුෂ්පිකා එක්ක අපි ටිකක් කතා කරමු.
පුෂ්පිකා ඔබ ගැන කෙටි සඳහනක් කළොත්?
මගේ සම්පූර්ණ නම මහම්පිටිය ආරච්චිලාගේ පුෂ්පිකා සඳමාලි ද සිල්වා. ගම පොළොන්නරුව. දැන් පදිංචිය කොළඹ. පවුලේ අම්මා, තාත්තා, අය්යා සහ අක්කලා දෙන්නයි. තාත්තා ව්යාපාර කටයුතුවල යෙදෙනවා. පවුලේ අනෙක් අයත් ඒ ව්යාපාරයට සම්බන්ධයි. මාත් ඒ ව්යාපාර කටයුතුවලට දායකත්වය ලබාදෙන අතරේ රූපවාහිනී නිවේදිකාවක ලෙසත් (හිරු - මංගලම්) කටයුතු කරනවා. ඊට අමතරව තෝරාගත් වෙළෙඳ නාම සඳහා නිරූපණ අංශයෙත් යෙදෙනවා.
ලංකාවේ වැඩිම මුදලක් අය කරන නිරූපන ශිල්පිණිය වන්නෙත් ඔබද?
ඒක නම් මම දන්නේ නැහැ. ඒත් ඒක ඇත්ත වෙන්නත් පුළුවන්.
ඇයි ඔච්චර ලස්සන වෙලත් රඟපාන්නේ නැත්තේ?
හැමදාම වගේ ඒ වෙනුවෙන් නම් ආරාධනා ලැබෙනවා. ඒත් මම හිතන්නේ රඟපෑම කියන දේ ලෙහෙසි පහසු දෙයක් නෙවෙයි. ඒ වෙනුවෙන් ගොඩාක් කැපවෙන්න ඕනෑ. හරියට කරන්නත් ඕනෑ, තවම ඒ ගැන හිතලා නැහැ.
පුෂ්පිකාගේ ජීවිතයේ අරමුණ වුණේ මොකක්ද?
පොඩිකාලයේ ඉඳලාම කවදාහරි රූ-රැජිණ වීමේ සිහිනයක් තිබුණේ. එය යථාර්ථයක් වුණා. ඊට දායකවීම නිසා ජීවිතයේ මම ලැබූ අත්දැකීම් බොහෝමයි. දැන් මගේ අරමුණ සමාජයට ඒ අත්දැකීම් බෙදා හදා දීමට කටයුතු සැළැස්වීමයි.
ඒ මොන විදියටද?
විශේෂයෙන්ම තාරුණ්යයේ හෙට ගමන සාර්ථක කර ගැනීම සඳහා ආත්ම විශ්වාසය, පෞර්ෂ වර්ධනය, ධනාත්මක චින්තනය ආදී බොහෝ දේ වැදගත්. ඒ වගේම මනෝවිද්යාව ගැනත් දැන සිටීම හරිම වැදගත්. මම ඒ ගැනත් හැදෑරුවා. ඒ සියලූ දේ වෙතින් පෞර්ෂත්ව වර්ධනය සඳහා වූ උපදේශනය ලබාදෙන පාසලක් ඇරඹීම මේ වසරේ මගේ බලාපොරොත්තුවයි. එයින් සමාජයට ලොකු මෙහෙවරක් කළ හැකි බව මගේ විශ්වාසයයි. කෙනෙකුට ජීවිතය ජය ගන්න නම් ආත්ම විශ්වාසය කියන දේ හරිම වැදගත්. මම විශ්වාස කරන විදියට මෙය විෂයක් ලෙස අපේ ජාතික අධ්යාපන ක්රමයට එක් කළ යුතුයි. අපි දියුණුව කරා යන ගමන සාර්ථක වන්නේ එවිටයි.
දැන් පදිංචිය කොළඹ වුණත් මම ආවේ ගමෙන්. අදටත් මගේ ජීවිතයේ බොහෝ දවස් ගෙවෙන්නේ පොළොන්නරුවේ සිටයි. අපි ඒ යථාර්ථය රැුකගෙන ලෝකයට ගිහින්, රටට යමක් කිරීම වැදගත්. ඊටත් අමතරව රූපලාවන්ය ක්ෂේත්රය සඳහා මගේම නිෂ්පාදනයක් හඳුන්වාදීමත් තවත් අරමුණක්.
මේ සුන්දරිය ‘ආදරය’ දකින්නේ මොන විදියටද?
ආදරය කොච්චර සුන්දර දෙයක්ද? ඇත්තෙන්ම සුන්දරයි. මේ උදාවූ 2015 අපි වෛරය, බොරුව තුරන්කොට ආදරයෙන්ම සමාජය දෙස බැලීම වැදගත්. සමාජය සුවපත් කිරීමට හොඳම බෙහෙත තමයි ‘ආදරය’. ඒ නිසා 2015 සියලූ ශ්රී ලාංකිකයින්ට ආදරණීයම වසරක් වේවායි මම ආදරයෙන් ප්රාර්ථනා කරනවා.
විලාසිතා - මයිකල් විජේසූරිය.
හැඩ ගැන්වීම් - සැලෝන් කැපෙලෝ
මල් කළඹ - Kandianflora
