‘‘දිනේෂ්, වාසුදේව, ගම්මන්පිල හා විමල් යන හතර දෙනාටයි මහින්ද ඕන වෙලා තියෙන්නේ. හතර දෙනාම දේශපාලන අනාථයෝ දිනේෂ් වාසුදේව ඔවුන්ගේ පක්ෂවලින් ඡන්දය ඉල්ලා මන්ත්‍රී වුනේ නැහැ. ගම්මන්පිලට පක්ෂයක්වත් නෑ. වීරවංශ ගැන කථා කරල වැඩක් නෑ.

මේ නන්නත්තාර කණ්ඩායමයි මහින්ද බලයට ගේන්න හදන්නේ. අවුරුදු 9ක් මුදල්, දේශපාලන හා මාධ්‍ය බලය පාවිච්චි කර ජයගන්න බැරිවූ මහින්ද ඔය විදියට ගියොත් තංගල්ල ප්‍රාදේශිය සභාවටත් ඉල්ලාවි. ඒකෙන් පැරදුණොත් සමුපකාර ඡන්දෙටත් එයි. ඒක එයාගෙ අයිතිය.

ජාතික ආණ්ඩුවක මුවාවෙන් අද ප්‍රෝඩාවක් කරනවා. පරාදවූ පක්ෂය යළි ආණ්ඩු බලයට ගෙන ඒමයි ඒ ප්‍රෝඩාව.

ජනාධිපති අරමුදලෙන් සාමාන්‍ය රෝගියකුට ලැබෙන්නේ රුපියල් එක් ලක්ෂ 75,000 යි. එහෙත් ඕස්ට්‍රේලියාවේ හෝටලයක ජනේලයකින් පනින්න ගිහින් කකුල කඩාගත්ත කෙහෙළිය රඹුක්වැල්ලට 2012 දි රුපියල් ලක්ෂ 100 ක් දීලා. හිටපු අගමැති දිමුට ලක්ෂ 292 ක් දීලා. මහින්ද රාජපක්ෂ එයාගෙ නමින් පලස්තීනයේ ගාසා තීරයේ වෘත්තීය පුහුණු මධ්‍යස්ථානයක් හදන්න කෝටි 13 ක් දීලා.

මාලදිවයිනේ පාරක් හදන්න ලක්ෂ 13,000 ක් දීලා. කොන්ත්‍රාත් එක ලංකාවෙ කෙනෙක්. ගලුත් ලංකාවෙන්. මේ හොරකම් නාස්තිකාර වැඩ එළිකරන්නේ ජවිපෙ පමණයි.‘‘

ජනතා විමුක්ති පෙරමුණු නායක අනුර කුමාර දිසානායක මහතා මහරගම රැස්වීමකදී ප්‍රකාශ කළේය.

එහිදී අදහස් දැක්වූ කේ.ඩී. ලාල්කාන්ත මහතා මෙසේ කිවේය.

‘‘පාර්ලිමේන්තුවේ බහුතරයක් පක්ෂ මහින්ද රාජපක්ෂ පළවා හැරීමට පෙරමුණ ගත් අයයි. මෛත්‍රීපාල මහත්තයා අප්‍රේල් 23 න් පස්සේ පාර්ලිමේන්තුව විසිරුවා නොහලොත් එදා ඉඳල පාර්ලිමේන්තුව වර්ජනය කරන ලෙස අපි ඉල්ලනවා.‘‘