පසුගිය ජනපතිවරණයට පෙර 2014 නොවැම්බර් 21 වැනි දින මාධ්‍ය හමුවක් පවත්වමින් ජනාධිපති අපේක්ෂක මෛත්‍රිපාල සිරිසේන මහතා (දැන් ජනපති) තමා ජයග්‍රහණය කළහොත් එක්සත් ජාතික පක්ෂ නායක රනිල් වික්‍රමසිංහ මහතා අගමැති ධූරයට පත් කරන බවට කළැයි කියන ප්‍රකාශය අල්ලස් දීමක් බව කියමින් පිවිතුරු හෙළ උරුමයේ ප්‍රධාන ලේකම් උදය ගම්මන්පිල අද (13) පස්වරු 3ට අල්ලස් කොමිසමට පැමිණිල්ලක් බාර දුන්නේය.

1981 අංක 15 දරණ ජනාධිපතිවරණ පනත අනුව ජනාධිපතිවරණයේදී තමන්ගේ ජයග්‍රහණය තහවුරු කර ගැනීම සඳහා තනතුරු පොරොන්දු වීම, තනතුරු ලබාදීම මෙන්ම තනතුරු බාර ගැනීම ද අල්ලස් වරදක්වේ. ඒ අනුව ජනාධිපති සිරිසේන මහතා ජනාධිපතිවරණ ජයග්‍රහණය සඳහා කටයුතු කිරීම වෙනුවෙන් තනතුරක් පොරොන්දු වීම සහ ලබාදීම යන වැරදි ද අගමැති රනිල් වික්‍රමසිංහ මහතා තනතුරක් භාර ගැනීම යන වරදද සිදු කර ඇතැයි පැමිණිල්ලේ දැක්වේ.

‘ආණ්ඩුවේ දින 100 ඉවරයි. දැන් තියෙන්නේ අපේ දින 100. මෙතැන් පටන් සතිපතා අපි අල්ලස් කොමිසමට ඇවිත් දින 100ත් ඊට පෙරත් සිදුවුණු දූෂණ ගැන පැමිණිලි කරනවා‘ යැයි ගම්මන්පිල එහිදී පැවසීය.

ඡායාරූප හා වීඩියෝ - ශාන්ත රත්නායක