(යොහාන් භාසුර)
ශානි අබේසේකර සහ හිජාස් හිස්බුල්ලා වැනි පුද්ගලයන් පෙන්වා බිල්ලන් මවා ජාතිවාදය වපුරවමින් රට විනාශ නොකරන ලෙස සමඟ ජනබලවේග මන්ත්‍රී හරීන් ප්‍රනාන්දු මහතා පාර්ලිමේන්තු විවාදයට එක්වෙමින් පැවසීය. එහිදී මන්ත්‍රී හරීන් ප්‍රනාන්දු මහතා වැඩිදුරටත් මෙසේ ද පැවසීය.
“ශානි අබේසේකර, හිජාස් හිස්බුල්ලා පෙන්වලා මේ රටේ බිල්ලො මවනවා වෙනුවට අලුත් ගමනක් යන්න ඕන නම් දේශපාලන වශයෙන් අපි සර් කියන්න කැමති මිනිස්සු ගන්න”
“ලංකාවට ගණිකා වෘත්තිය ගේන, අපේ ලංකාව තරම්වත් ආර්ථිකයක් නැති සංචාරකයො ගෙනල්ලා යාල වස්සලා. සීගිරිය පොළොන්නරුවට ගේන්න හදලා. මේ කරන විනාශයට විරුද්ධව ඔබතුමාලත් හිට ගනී කියලා හිතනවා”
“ගරු මුලාසනය හොඹවන මන්ත්‍රීතුමනි, අවාසනාවකට, එක රටක් එක නීතියක් කියන විට මට මතක් වෙන්නේ අපි වැස්ස දවසකට ත්‍රීවිල් එකක යනවා වගේ. කොයි වෙලාවෙ මොන වළේ වැටෙයිද? කොයි වෙලාවේ ත්‍රීවිල් එක නවතීද? කොයි වෙලාවේ අපිව තෙමෙයිද? හරියට තීන්දුවක් නොමැතිව විශ්වාසයක් නොමැතිව බලාගෙන ඉන්න අවදියක එක රටක් එක නීතියක් ගැනත් පුංචි ප්‍රශ්නයක් තියෙනවා”
“ජනාධිපති සමාව දෙන රැල්ලක් පටන් අරන්. ඔය රැල්ල එන්නෙ මොන පොල් පැළේ කන්නද කියලත් අපි හොඳට දන්නවා”
“මේ රටේ මිනිස්සු හිතුවේ අවුරුද්දක් යනකොට කොහොමද නීතිය කියලා ඇහුවම අතිවිශිෂ්ටයි සර් කියයි කියලා. අද මේ ලංකාවේ තියෙනවා අමුතු නීති රාශියක්. රාජපක්‍ෂ නීතිය, ගජමිතුරු නීතිය, කෝවිඩි නීතිය, දුප්පතුන්ගේ නීතිය, යුක්රේන් ජාතිකයන්ට දෙන නීතිය”
“සර් නෙවිඩාලෝ කියනවා. මේක යුක්රේන භාෂාවෙන් සර් ෆේල් කියන එක. ආපු පළමු ගුවන් යානයේම කෙල්ලො 18 දෙනෙක්ටම මාස තුනක වීසා දීලා. මේකට හේතුව තමයි දේශපාලනයේ ප්‍රාදේශීය සභාවකවත් හිටපු නැති කෙනෙක් ජනාධිපති වීම. සිස්ටම් වෙනස් කරන්න ආවට සිස්ටම් එක තේරෙන්නේ නෑ”
“අද රට පාලනය කරන්නේ කවුද? සර්ගේ සාපේ අපි කියන්නේ ‘ස’ සාපේ. පස්දෙනෙක් තමයි රට පාලනය කරන්නේ”
“උදයංග වීරතුංග, සංචාරක බුබුලේ ඉන්න ඕන කෙනා මාස් එකක් දාන්නෙ නැතුව මාධ්‍ය සාකච්ඡා තියෙනවා. හොඳ නළුවා විල්සන් කරූ හිරේ යනවා. ලැජ්ජයි, කැතයි...”
“අපිට ගැහුවා මහ බැකුවෙන් බිලියන 10 ක් ගැහුවා කියලා. එක ෂොට් එකෙන් සීනිවලින් ගැහුවා බිලියන 10 ක්. මහබැංකු හොරකම වෙනුවෙන් බිලියන 10 ක සංචිතයක් තියාගත්තා. එහෙම තිබුණා”
“මිනිස්සු 64,000 ක් එන්න බැරිව දුක්විදිනවා. හිතලා බලන්න, ටෙලිකොම් එකේ සන්නාම නාමය වෙනස් කරන්න බිලියන දෙකක් වියදම් කරනවා”
“මෙතුමන්ලා ජයග්‍රහණය කරන්න හදන්නෙ ජාතිවාදයෙන්මයි. මම හිටගන්නේ ජාතිකවාදයත් එක්ක. අලීස් අබී්‍ර මහත්තයා අධිකරණ ඇමති කළාට අලීස් අබී්‍ර මහත්තයා පිටින් තමයි ඔක්කෝම යන්නේ. ඔබතුමා මුස්ලිම් ජාතිකයෙක් නිසා ඔබතුමාලම පත්කළ ආණ්ඩුව ඔබතුමාට වටකරගෙන ගහනවා. අපි ගහන්නේ නෑ. අපිගාව තියෙන්නේ ජාතිකවාදයයි”
“හර්ෂණ රාජකරුණා මන්ත්‍රීතුමාගෙන් අහනවා ඔබේ ජාතිය මොකක්ද? ශ්‍රී ලාංකික, ආගම මොකක්ද? බුද්ධාගම. මගේ ජාතිය මොකක්ද? ශ්‍රී ලාංකික, ආගම රෝමානු කතෝලික, ඔබේ ජාතිය මොකක්ද? ශ්‍රී ලාංකික, ඔබ මුස්ලිම්. මේක දේශපාලනය කරගෙන තමන්ගේ බඩගෝස්තරය නිසා ජාතිවාදය අවුස්සමින් ඉන්නවා”
“හිජාස් හිස්බුල්ලා කියන්නේ ගල්කිස්ස සාන්ත තෝමස් විදුහලේ කීර්තිමත් ශිෂ්‍යයෙක්. ප්‍රධාන ශිෂ්‍යනායක. ශ්‍රී ලංකා වෝටර්පෝලෝ කණ්ඩායමට ක්‍රීඩා කළා. සාන්ත තෝමස් වෝටර්පෝලෝ කණ්ඩායමේ නායකයෙක්. මෙතන තෝමියන්ස්ලා ඉන්නවා එක්කෙනෙක් කථා කරන්නේ නෑ මොකද මුස්ලිම් නිසා”
“හිජාස් හිස්බුල්ලට තියෙන චෝදනාව මොකක්ද? පුත්තලම පැත්තෙ පාසලකට ගිහිල්ලා මොනවද දේශනා කරයි කියලා. හැබැයි ඒ පාසලේ විදුහල්පතිගෙන්, ගුරුවරයෙක්ගෙන් හෝ ළමයකුගෙන්වත් සාක්‍ෂියක් අරන් නෑ”
“එතුමාව 8 වැනිදා උපාවියට ගේනවා. අපිට ආරංචියි අලුත් චෝදනාවක් දානවා කියලා. ත්‍රස්තවාදය වැළැක්වීමේ පනතින් ජනාධිපතිගේ අත්සනින් තමයි එතුමාව ඇතුළට ගත්තේ” යයිද හරීන් ප්‍රනාන්දු මහතා පැවසීය.
