ධර්මදුත සේවය සදහා ශ්රී ලාංකික හිමිවරු ලෝකය පුරා වැඩමකර සිටිති. ඉන්දියාවේ තානා දිස්ත්රික්කයට අයත් උල්ලාස් නගරයේ මහින්ද විහාරයේ විහාරාධිපති නලිවේල ආනන්ද හිමියෝ වචනයේ පරිසාම්ප්ත අර්ථයෙන්ම සැබැ ධර්මදුත සේවයේ යෙදෙන හිමි නමකි.
1971 දී ළමුන් 35 දෙනෙක් සමග විහාරස්ථානයට යාබදව ආරම්භ කළ තක්ශිලා විද්යාලයේ මේ වනවිට ළමුන් 5000 ක් ඉගෙනුම ලබති. අද දින ලංකාදීප එසැණ එම විද්යාලයට ගියේය. ආනන්ද හිමියන් අපව පංති කාමරයෙන් කාමරයට රැගෙන ගිය අතර මොහොතකින් සිසුනගේ විවේක කාලය එලඹුණි. අප ක්රීඩාංගනය මැදින් නැවත විහාරස්ථානය කරා පැමිණෙන අතරතුර ආනන්ද හිමියෝ වටකරගත් ළමුන් උන්වහන්සේගේ දෙපා සිඹින, දෙපා අතගාන, බදා ගන්නා අයුරු දුටු අපගේ දැසට කඳුලක් එක් විය.
‘‘මහත්තයෝ මේ ළමයින්ගේ දෑස පාදන්න මම විදින දුක් වින්ද දුක් අපමණයි. මේ ඔක්කොම අසරණ දුප්පත් දරුවෝ. මරාටි තමයි මෙයාලගේ භාෂාව. මම අවුරුදු 46ක් පුරාවට ඉන්දියාවේ ඉන්නේ. මට සිංහල, පාලි, හින්දි ඉංග්රීසි මරාටි දෙමල භාෂාවල් පුළුවන්. මාපලගම සිරි සරණංකර හිමිපාණන් තමයි මාව ඉංදියාවට රැගෙන ආවේ. බද්දේගම විමලවංශ මාහිමිපාණන් තමයි මට මේ දේවල් කරන්න උපදෙස් දුන්නේ.
මේ පින් උන්වහන්සේලාටත් අයිති වෙනවා. මම ගමේ අසරණ මිනිස්සුන්ටත් ගොඩක් පිහිට වෙනවා. ඒ හැමෝම මට ආදරෙයි. දිල්ලි තානාපති කාර්යාලය වගේම මුම්බායි ශ්රී ලංකා කොන්සියුලර් කාර්යාලයෙනුත් අපිට උදව් තියෙනවා. අපි ගැන හොයලා බලනවා. මහා මහින්ද ජාත්යන්තර ධර්මදුත සංගමය මගින් තමයි මේ හැමදේම පාලනය වෙන්නේ.‘‘ යැයි ආනන්ද හිමියෝ අප සමග පැවසුහ.
