(අංජුල මහික වීරරත්න)

යාපනය විශ්වවිද්‍යාලයේ සම සෞඛ්‍ය විද්‍යා පීඨය සඳහා නවීන පහසුකම් වලින් සමන්විත ගොඩනැගිල්ලක් ඉදිකිරීමට කැබිනට් අනුමැතිය ලැබී ඇත.

2006 වර්ෂයේදී රාජ්‍ය විශ්ව විද්‍යාල වල සම සෞඛ්‍ය විද්‍යවන් පිළිබඳ උපාධි පාඨමාලවන් හඳුන්වා දී ඇති අතර යාපනය විශ්ව විද්‍යාලයේ වෛද්‍ය රසායනාගාර විද්‍යාව, ඖෂධ වේදය සහ භෙද යන ක්ෂේත්‍ර වල විද්‍යාවේදී (ගෞරව) පාඨමාලා තුනක් ආරම්භ කර ඇත.

මේ වන විට යාපනය විශ්ව විද්‍යාලයේ සම සෞඛ්‍ය විද්‍යා පීඨයේ සියලුම ජනවර්ග නියෝජනය කරමින් විෂය ක්ෂේත්‍ර හතරක (වෛද්‍ය රසායනාගාර විද්‍යාව, ඖෂධ වේදය, හෙද සහ ශාරීරික අධ්‍යාපනය) සිසු සිසුවියෝ  952 ක් අධ්‍යාපන කටයුතු වල නිරතව සිටිති. 2017 වර්ෂයේදී සම සෞඛ්‍ය විද්‍යාපීඨය සඳහා ගොඩනැගිල්ලක් ඉදිකිරීමට අමාත්‍ය මණ්ඩල අනුමැතිය හිමි වී ඇති නමුත්, පැවති මූල්‍ය අර්බුදය හේතුවෙන් ඒ සඳහා අරමුදල් ලැබී නොමැත. 

එම තත්ත්වය මත, යාපනය සම සෞඛ්‍ය විද්‍යා පීඨය මේ වන විට උග්‍ර යටිතල පහසුකම් ඌනතාවකට මුහුණ දෙමින් සිටියි. එබැවින්, යාපනය විශ්ව විද්‍යාලයේ සම සෞඛ්‍ය විද්‍යාපීඨය සඳහා දේශන ශාලා, විද්‍යාගාර, නිබන්ධන කාමර, වෙන් කළ විභාග ශාලාවක් සහ ශ්‍රවණාගාරයකින් සමන්විත නව පස් මහල් ගොඩනැගිල්ලක් රුපියල් මිලියන 2,234ක ඇස්තමේන්තු ගත පිරිවැයක් යටතේ ඉදි කිරීම පිණිස අධ්‍යාපන, උසස් අධ්‍යාපන සහ වෘත්තීය අධ්‍යාපන අමාත්‍ය වශයෙන් අග්‍රාමාත්‍යවරිය  ඉදිරිපත් කළ යෝජනාව අමාත්‍ය මණ්ඩලය විසින් අනුමත කරන ලදී.