අයහපත් කාලගුණය හේතුවෙන් ධීවරයන් හත් දෙනකු ඇතුළු අට දෙනෙක් මියගොස් 41 දෙනකු අතුරුදන්ව ඇතැයි ද 22 ක් රෝහල්ගතව ප්‍රතිකාර ලබන බව ද ජාතික ආපදා කළමනාකරණ ඒකකය පවසයි.
ගුවන් හා නාවුක හමුදා විසින් බේරාගන්නා ලද ධීවරයන් සංඛ්‍යාව 20 කි. ධීවර යාත්‍රා 30 ක් මේ දක්වා සොයාගැනීමට නැත.
දිසාපතිවරුන්ගේ සංඛ්‍යාලේඛණ අනුව නිවාස 68 ක් පූර්ණ හානියට පත්ව ඇති අතර අර්ධ හානි සිදුවූ නිවාස සංඛ්‍යාව 1500 ට අධිකය. ගාල්ල දිස්ත්‍රික්කයේ නිවාස 31 ක් පූර්ණ හානි සිදුව ඇති අතර 865 කට අර්ධ හානි සිදුව තිබේ. කළුතර දිස්ත්‍රික්කයේ පූර්ණ හානි සිදුවූ නිවාස සංඛ්‍යාව 19 කි. අර්ධ හානි සිදුවූ නිවාස 600 කි. මාතර දිස්ත්‍රික්කයේ නිවාස 18 ක් පූර්ණ හානි සිදුව ඇති අතර නිවාස 108 ට අර්ධ හානි සිදුව ඇත. රත්නපුර දිස්ත්‍රික්කයේ අර්ධ හානි සිදුවූ නිවාස සංඛ්‍යාව 50 කි.
මහ වැසි හේතුවෙන් ලක්ෂපාන, කැනියොන් හා විමලසුරේනද්‍ර ජලාශවල වාන් දොරටු විවෘතකැර ඇති අතර කැළණි ගඟ, කළු ගඟ, ගිං ගඟ, නිල්වලා ගඟ, බෙන්තර ගඟ හා රත් ග‍ඟෙහි ජල මට්ටම ඉහළ යමින් තිබෙන බව ද ආපදා කළමනාකරණ මධ්‍යස්ථානය පවසයි.
කාලගුණ විද්‍යා දෙපාර්තමේන්තුව සඳහන් කරන්නේ තවදුරටත් මෝසම් සුළං හේතුවෙන් බස්නාහිර, සබරගමුව, දකුණු හා මධ්‍යම පළාත්වල තැනින් තැන තද වැසි ඇතිවන බවයි. එමෙන්ම මන්නාරම සිට කොළඹ ගාල්ල හරහා පොතුවිල් දක්වා මුහුදු ප්‍රදේශ රළු ස්වභාවයක් ගන්නා බැවින් හා ඇතැම් අවස්ථාවලදී පැයට කිලෝ මීටර 50 – 70 ත් අතර වේගයකින් සුළං හමායා හැකි බැවින් මුහුදු නොයන ලෙස ද කාලගුණ විද්‍යා දෙපාර්තමේන්තුව ඉල්ලා සිටියි.
