අද (17) සිට විදුලි කප්පාදුව නවත්වා සුපුරුදු පරිදි විදුලිය ලබා දෙන බවට දුන් පොරොන්දුව තාක්ෂණික කාරණා නිසා ඉටු කිරීමට ප්රමාද වීම සම්බන්ධයෙන් කනගාටුව පළ කරන බව විදුලිබල නියෝජ්ය ඇමැති අජිත් පී පෙරේරා මහතා පැවසීය.
නොරොච්චෝලේ ජනන යන්ත්ර තුනෙන් එකක් පමණත් වැඩ කරන බවත්, තවත් යන්ත්රයක් අද ක්රියාත්මක කිරීමට උත්සාහ ගනිමින් සිටින බවත්, එලෙස ක්රියාත්මක වුවොහොත් දිගටම විදුලිය දිය හැකි බවත් පෙරේරා මහතා කීවේය.
මෙය කාගේ හෝ කුමන්ත්රණයක්දැයි මාධ්යෙව්දීන් ප්රශ්න කරද්දී ඇමති කීවේ එය ඕනෑම ආකාරයකට අර්ථ දැක්විය හැකි වුවත් තීන්දුවක් දිය යුත්තේ දේශපාලනඥයන් නොව පොලිසිය හා අදාළ අංශ බවයි.
විදුලි පද්ධතියේ ආරක්ෂාවට යුද හමුදාව යෙදවා ඇත්තේ ඇයිදැයි ඇසූ විට ඇමතිවරයා කීවේ ජනපතිට ලද තොරතුරු මත හා යමක් වීමට පෙර වළක්වා ගැනීමේ පදනම මත යුද හමුදාව යෙදවා ඇති බවයි.
‘මෙය නොසිතූ දෙයක්. හරියට සුනාමියක් වගෙයි. මුලින්ම අපි විදුලි පද්ධතිය යතාවත් කරන්න වෙහෙසෙනවා. ඉන් පසු මේ සිදුවීමට වගකිවයුත්තේ කවුද කියා හොයනවා.
නොරොච්චෝලේ බලාගාරේ කියන්නේ අපට ලැබුණු ආබාධිත දරුවෙක්. අඩුපාඩු ගොඩස් සමගයි ලැබුනේ. නමුත් ඒ ළමයා අපි කොහොම හරි හදා වඩා ගන්නවා. අපි ඒ ළමයාත් ආදරෙන් රැක බලා ගන්නවා. ‘
