(රෝෂන් තුෂාර)
ජාතික ලොතරැයි මණ්ඩලයේ හිටපු අධ්‍යක්ෂවරයෙකු වන තුසිත හල්ලොලුව ගමන්ගත් මෝටර් රථයකට වෙඩි තැබීම සිද්ධිය සම්බන්ධයෙන් අත්අඩංගුවට ගත් තවත් සැකකරුවකු පැය 48ක් කොළඹ අපරාධ කොට්ඨාසය භාරයේ රඳවා ප්‍රශ්න කිරීමට කොළඹ අතිරේක මහේස්ත්‍රාත් පසාන් අමරසේන මහතා අද (12) අවසර ලබා දුන්නේය.
කොළඹ අපරාධ කොට්ඨාසය මගින් අත්අඩංගුවට ගෙන ආදී එකලනයට ඉදිරිපත් කළ අවිශ්ක නමැති සැකකරුවකු මෙසේ රඳවා ප්‍රශ්න කිරීමට අවසර ලබා දුන්නේය.
කොළඹ අපරාධ කොට්ඨාසයේ නිලධාරීන් අධිකරණයට කරුණු ඉදිරිපත් කරමින් සඳහන් කර සිටියේ සිද්ධිය සම්බන්ධයෙන් අත්අඩංගුවට ගත් සැකකරුවන් සන්තකයේ තිබූ ඡංගම දුරකථන 13 විමර්ශන කටයුතු සඳහා රජයේ රස පරීක්ෂක වෙත යොමු කර තිබෙන බවය.
මෙම සිද්ධියට අදාළ තවත් සැකකරුවන් දෙදෙනෙක් වන ජෑම් ජෙසුවා සහ හරිස්චන්ද්‍ර නැමැති සැකකරුවන් දෙදෙනා ගම්පහ මහේස්ත්‍රාත් අධිකරණයට ඉදිරිපත් කිරීමෙන් අනතුරුව ලබන 20 දක්වා රක්ෂිත බන්ධනාගාර ගත කර ඇති බවද පැවසීය.
එම සැකකරුවන් දෙදෙනා මෙම විමර්ශනයේ අටවෙනි හා නව වැනි සැකකරුවන් ලෙස නම් කරන බවද කොළඹ අපරාධ කොට්ඨාසය අධිකරණයට දැන්වීය.
ප්‍රධාන සැකකරු වන වෙඩික්කරු විසින් නව වන සැකකරු වන හරිස්චන්ද්‍ර නමැත්ත්තාට ලබාදී තිබූ පාර්සලයක තිබී එහි T 56 ගිනි අවියක්, උණ්ඩ හයක්, ගංජා හා අයිස් මත්ද්‍රව්‍ය හා රත්තරන් තොගයක් සොයා ගත් බවද විමර්ශන නිලධාරීන් අධිකරණයට දැන්වීය.
සිද්ධියට සම්බන්ධ හයවන සැකකරු වන රුවන් පුෂ්ප කුමාර නමැත්තා සිද්ධියට අදාළ ප්‍රධාන සැකකරු වන වෙඩික්කරු සමග යතුරු පැදියේ ගමන් ගත් බවට විමර්ශන වලින් අනාවරණය වී ඇති බවද පැවසීය.
කොළඹ අපරාධ කොට්ඨාසය අධිකරණයට ඉදිරිපත් කළ කරුණු සලකා බැලු මහේස්ත්‍රාත්වරයා සැකකරූපය 48ක් රඳවා ප්‍රශ්න කිරීමට අවසර ලබා දුන්නේය.
