බිම වැටී සිහි නැති වී සිටි තම මව (72) ගාල්ල කරාපිටිය රෝහලේ හදිසි ප්‍රතිකාර ඒකකයට ඇතුළු කිරීමෙන් පසු මිනිත්තු හතලිස් පහක් යන තුරු වෛද්‍යවරයකු ඇය පරීක්ෂා නොකළ බව ගාල්ල ලංකාදීප මාධ්‍යවේදී වේරගොඩගේ සජීව විජේවීර ගාල්ල පොලීසියට පැමිණිළි කළේය.
ඉරිදා (09) රාත්‍රී 7.15 ට මව රෝහලට රැගෙන ආ නමුත් වාට්ටුවේ වෛද්‍යවරයකු නොසිටි බවත් පැය භාගයකට පසු වෛද්‍යවරුන් වැනි සිව් දෙනකු රුපවාහිනීයේ ක්‍රිකට් තරඟයක් නරඹමින් සිටි බව පැමිණිල්ලේ සටහන් වේ .
ඔවුන් සිටි ස්ථානයට යමින් සිටියදී තමා ජංගම දුරකථනය අතට ගත් බවත් තමා ඔවුන්ගේ ඡායාරූපයක් ගැනීමට යතියි එක් පුද්ගලයකු කෑ ගැසු බවත් ඔවුන් තමාට බැන වැදී අධ්‍යක්ෂකට එය පැමිණිළි කළ බවත් ඒ අනුව තමා අත්අඩංගුවට ගන්නා ලෙස රෝහල් අධ්‍යක්ෂ සිය නිවසේ සිට රෝහල් පොලීසිය හා ආරක්ෂක අංශ කැදවු බවත් ඔහුගේ පැමිණිල්ලේ සදහන්ය.
තම මවට ප්‍රතිකාර නොකර වෙනත් ප්‍රශ්නයක් මත තමා රදවාගෙන සිටීමට විරෝධය පළ කළ නමුත් තමන් රෝහල් පොලිසියට කැදවාගෙන ගිය බවද එම පැමිණිල්ලේ දැක්වේ.
ප්‍රතිකාර නොලැබු හෙයින් තම මව පෞද්ගලික රෝහලකට ගෙන යාමට සිදු බවත් රුධිර සීනී මට්ටම හාරසිය දක්වා ඉහළ ගොස් තිබු බවත් එහි එහීදී වහා ප්‍රතීකාර කළ බවත් ඔහුගේ පැමිණිල්ලේ සදහන්ය.
මේ පිළිබඳ රෝහල් අධ්‍යක්ෂ වෛද්‍ය ෂෙල්ටන් පෙරේරා මහතාගෙන් විමසූ විට ඔහු මෙසේ කීවේය.
ඔහු වාට්ටුවේ පින්තූරයක් ගත බව වාට්ටුවෙන් දැනුම් දුන්නා. එලෙස ඡායාරූපයක් ගත්තානම් එය බරපතල වරදක්. ඒ බව අපි පොලීසියට දැනුම් දුන්නා. ඊළගට පොලීසිය තමයි ඒ ගැන ක්‍රියාත්මක වෙන්නේ. ඒ වෙලාවේ හිටපු වෛද්‍යවරයා වෙනත් රෝගියෙක් බලමින් සිටියේ. ඔහු ඡායාරූප අරගෙන තියෙන්නේ සේවය අවසන්ව නිවසට යාමට සිටි වෛද්‍යවරයකුගේ. එයාගේ අම්මා බරපතල තත්ත්වයෙන් හිටියේ නැහැ. අපි රෝගීන්ට ප්‍රතිකාර කරන්නේ වර්ගීකරණය කරලා. ඒ මහතාට අසාධාරණයක් සිදුවුනානම් මට ලිඛිතව පැමිණිලි කළ යුතුව තිබුණා. නමුත් එවැන්නක් කළේ නැහැ. ඔහු මට මේ ගැන දුරකථනයෙන් දැනුම් දුන්නා පමණයි. රෝහලේ වෛද්‍යවරු ගැන පරීක්ෂණයක් පැවැත්වීමට එය ප්‍රමාණවත් නැහැ.
ගාල්ල දිස්ත්‍රික් මාධ්‍ය සංවිධාන කිහිපයක් මේ සම්බන්ධයෙන් සෞඛ්‍ය අමාත්‍ය මෛත්‍රීපාල සිරිසේන මහතාට ද පැමිණිලි කැර තිබේ.
