ප්‍රකෝටිපති කැසිනෝ ව්‍යාපාරික ජේම්ස් පැකර් හා ඔහුගේ දෙවැනි මනමාලයා වූ නයින් එන්ටර්ටේන්මන්ට් ප්‍රධාන විධායක ඩේවිඩ් ගින්ජල් ඕස්ට්‍රේලියාවේ සිඩ්නි නුවර බොන්ඩි පෙදෙසේ මහ පාරක දී ඉරිදා (4) සවස හොඳටම ගුටි ඇන ගත්හ.

දෙන්නා පිස්සු බල්ලන්  වගේ රන්ඩු වුණා යැයි සිද්ධිය සියැසින් දුටුවෙක් කීවේය.

ගැටුමට හේතු වූයේ පැකර්ට ඕස්ට්‍රේලියාවෙන් ලැබුණු දුරකතන ඇමතුමකි.

පැකර් ඒ වන විට සිටියේ ශ්‍රී ලංකාවේය.

 ඩොලර් කෝටි 40 ක (රුපියල් කෝටි 5280) සුපිරි කැසිනෝ  මධ්‍යස්ථානය ගොඩ ගැනීමේ අවසන් උත්සාහය සඳහා ඔහු ශ්‍රී ලංකාවට පැමිණ සිටියේය.

දුරකතන ඇමතුමෙන් කියැවුණේ පැකර්ගේ නිවස ඉදිරිපිට නයින් එන්ටර්ටේන්මන්ට් වාහනයක් නතර කර ඇති බවයි.

පැකර් සිය බිරියගෙන් වෙන් වී මිරෙන්ඩා කර් නම් නිරූපිකාව සමග මිත්‍රකමක් පවත්වන හෙයින් නයින් එන්ටර්ටේන්මන්ට් වාහනය එහි එන්නට ඇත්තේ පින්තූර ගැනීමට විය හැකි යැයි පැකර්ගේ මිතුරා ඔහුට කියා ඇත.

පැකර් නයින් එන්ටර්ටේන්මන්ට් ප්‍රධාන විධායකට ඇමතුමක් ගත්තේය.

හොඳටම බැන්නේය. තම ආයතනයේ වාහනයක් පැකර්ගේ ගෙදර ඉදිරිපිට ඇති බව නොදන්නා බවත්, ඒ ගැන සොයා බලා දන්වන බවත් ගින්ජල් ඔහුට කීවේය.

ගින්ජල් පසුව සොයා ගත්තේ ඔහුගේ ආයතනයේ රියක රියදුරා වෙනත් රාජකාරියකට යමින් සිටිය දී ඒ අසළ පිහිටි ඔහුගේ නිවසට යෑම මේ කලබලයට හේතු වූ බවයි.

පැකර් ගුවන් මගින් සිඩ්නි නුවරට ගියේය. ජින්ජල් ද ඔහු හමුවීමට ආවේය. දෙදෙනාම හොඳටම ගහ ගත්හ. පැකර්ගේ දකුණු ඇස අසළ සීරී තිබිණි. ඇස රතුවී තිබිණි. නිකට වම් පස ඉදිමී තිබිණි.

රැවුල නොකපා සිටි ගින්ජල්ගේ දෙපයේ සපත්තු ද නොවීය.

ඔහු වෙනදා අඳින ව්‍යාපාරික ඇඳුම් කට්ටලය ඇඳ නොසිටියේය. පැකර් කාරයෙන් බසිනවාත් සමගම ජින්ජල් ඔහු ළඟට ගියේය.

දෙදෙනාම පුපුරමින් වහසි බස් කියමින් ගුටි ඇනගත්හ.

ගැටුමෙන් පසු පැකර්ගේ අසල්වැසියකු වූ ක්‍රිස් වෝකර් පැවසුවේ පිරිසක් පාරේ වැටී තිබුණු දත් සෙවූ බවයි. පැකර්ගේ ආරක්ෂකයන් දෙදෙනා මැදට පැන රණ්ඩුව බේරන තුරු ඔවුහු හොඳටම ගහගත්හ.

පැකර් නිවසට රැගෙන යනු ලැබීය. වෛද්‍යවරයෙක් ඔහුට ප්‍රතිකාර දීමට පැමිණියේය.

පැකර් හා ජින්ජල් අද උදේ පැකර්ගේ නිවසේ දී හමුවූහ. ඒකාබද්ධ නිවේදනයක් ද නිකුත් කළහ. ‘අපි දෙන්නා වසර 35ක් තිස්සේත් දැනුත් හොඳම මිතුරෝ වෙමු. මේ සිද්ධිය ගැන තවත් කිසිවක් කියන්නේ නෑ. මෙවැනි දෙයකින් අපේ මිත්‍රත්වය නවත්වන්නත් බෑ.‘

දෙදෙනා අතර රණ්ඩුව වීඩියෝ ගත කළ ඡායාරූප ගත කළ ඡායාරූප ශිල්පියෙක් එය රූපන් මර්ඩොක්ගේ නිව්ස්කෝපරේෂන් වෙත ඕස්ට්‍රේලියා ඩොලර් දෙලක්ෂයකට (රුපියල් කෝටි දෙකහමාරකට ආසන්න මුදලක්) අලෙවි කළේය.

මෙම සිද්ධියෙන් පසු ජේම්ස් පැකරුගේ සිඩ්නි කැසිනෝ හලට අවසර දීම ප්‍රශ්නයට ලක්වෙතියි කියති.

(ගැටුම සිද්වූ ස්ථානය)

(ගිංජල්)

(පැකර්)