කැලණිය විශ්ව විද්‍යාලයයේ පළමු වසරට ආ නවක සිසු සිසුවියන්ට ශිෂ්‍ය ව්‍යාපාර ගැන විශ්ව විද්‍යාල භූමියේදී දැනුවත් කිරීමට ඉඩ නොදුන්නැයි මහා ශිෂ්‍ය සංගමය අද සවස විරෝධතාවක් ඇරැඹීය.

විශ්ව විද්‍යාලයේ ප්‍රධාන පරිපාලන දොරටුවෙන් ඇතුළට යෑමට උත්සාහ කළත් පොලීසියෙන් ඊට ඉඩ නොලැබිණි.

දොරටුවෙන් පිටත සිට පැය භාගයක් පමණ විරෝධය පෑ තුන් සියයක් පමණ සිසුහු විශ්ව විද්‍යාලය අසළ පාරට පැමිණ බිම වාඩිවී ‘රුපියල් 2500යේ මහපොළ ශිෂ්‍යත්වය රුපියල් 5000දක්වා වැඩිකරනු‘, ‘නේවාසිකාගාර පහසුකම් වැඩිකරනු‘ ආදී විරෝධතා පාඨ කියන්නට වූහ.

පාරේ වාඩි වී සිටියදීම මීට ටික වේලාවකට පෙර අන්තර් විශ්ව විද්‍යාල ශිෂ්‍ය බල මණ්ඩලයේ කැඳවුම්කරු සංජීව බණ්ඩාර මහතා සිසුන් ඇමතීය.