ගාල්ල කරාපිටිය රෝහලේ කසළ දාහකයේ චිමිනිය නැතිව රාත්‍රී කාලයේ කසළ පිලිස්සීමෙන් හිසකරකැවිල්ල, වමනය ආදි ආබාධ රැසකට මුහුණ දී ඇතැයි අවට දිංචිකරුවෝ කියති.
පසුගිය 08 දා ඇතිවූ සැඩ සුළඟින් මෙම කසළ දාහකයේ චිමිනිය කොටස් තුනකට කැඩී බිම පතිත විය. රෝහල අවට පදිංචිකරුවන් පවසන්නේ දැන් චිමිනිය නැතිව එහි කසළ පිලිස්සීම හේතුවෙන් තම නිවාස කළු දුමාරයකින් වැසී යන බවයි.
එම්.බී.එම්.ෆුරුකාන් මහතා (43)
මේ දුම නිසා අපේ නිවෙස් වලට ඉන්න බැරිවෙලා. එළිවෙනතුරු දුම් එනවා. පොඩි ළමයින්ට කැස්ස එනවා. වමනය කරනවා.
ඒ.ජී.සිසිර කුමාර මහතා (34)
දැන් චිමිනිය කැඩුනට පස්සේ රෑ හතට විතර තමයි පුච්චන්න පටන් ගන්නේ. මේකේ ප්ලාස්ටික් පවා පුච්චනවා. රෝහල අසළ ජීවත්වෙන අපි මේ නිසා ලෙඩ වෙනවා.
මෙය අලුත්වැඩියා රුපියල් ලක්ෂ 50 ක් පමණ වැයවන බවත් අමාත්‍යාංශයට ඒ බව දන්වා ඇති බවත් පවසන නියෝජ්‍ය අධ්‍යක්ෂ වෛද්‍ය ජයම්පති සේනානායක මහතා කියා සිටියේ විරෝධතා හේතුවෙන් කුණු පිළිස්සීම නවතා දැමීමට සිදුවුවහොත් රෝහල වසා දැමීමට සිදුවන බවයි. විකල්පයක් ලෙස සිමෙන්ති කර්මාන්ත ශාලාවේ පෝරණු යොදාගෙන කුණු පිළිස්සීමට හැකි ද යන්න සොයා බලන බවත් ඒ මහතා කීවේය.
සමස්ථ ලංකා සුව සේවා සංගමයේ දකුණු පළාත් ලේකම් සරත් ජයන්ත මහතා පවසන්නේ ලේ බැංකුව ද රාත්‍රී කාලයේ කළු දුමාරයෙන් වැසී යන බවයි. මේ හේතුවෙන් රෝහලේ සේවක සේවිකාවන් මෙන්ම රෝගීන් ද අනතුරේ හෙලා ඇතැයි ද ඒ මහතා කීවේය.
කරාපිටිය පාරිසරික හා ප්‍රජා සංවර්ධන සමිතිය ද මේ සම්බන්ධයෙන් සිය විරෝධතාව ප්‍රකාශ කරමින් බලධාරීන් දැනුම්වත් කැර ඇති බවත් කුණු නිවැරදි පාරිසරික ක්‍රමෝපායයන් නොමැතිව කුණු පිළිස්සීම වහාම නතර නොකළහොත් නීතිය ඉදිරියට යාමට අපේක්ෂා කරන බව ද එම සංවිධානයේ සංවිධායක වරයා කියා සිටියේය.
