(අංජුල මහික වීරරත්න සහ යොහාන් භාසුර)
ඉන්දියාවේ තරුණ කටයුතු සහ ක්‍රීඩා අමාත්‍ය මන්සුඛ් මන්දාවියා සහ ශ්‍රී ලංකාවේ තරුණ කටයුතු නියෝජ්‍ය අමාත්‍ය අමාත්‍ය එරංග ගුණසේකර මහත්වරුන් අතර හමුවක් ඉන්දියාවේ මහත්මා මන්දීර් සම්මේලන මධ්‍යස්ථානයේ දී පැවැත්විණි .
ඉන්දියාවේ තරුණ කටයුතු සහ ක්‍රීඩා රාජ්‍ය අමාත්‍ය රක්ෂා ඛාඩ්සෙ සහ තරුණ කටයුතු සහ ක්‍රීඩා අමාත්‍යාංශයේ ලේකම් නිතේෂ් කුමාර් මිශ්‍රා මහත්වරුද එම හමුවට එක්ව සිටියහ.
දෙරට අතර අධ්‍යාපන, තාක්ෂණ, ක්‍රීඩා, සංස්කෘතික වැනි අංශ ගණනාවක් ඔස්සේ තරුණ හුවමාරු වැඩසටහන් පැවැත්වීම පිළිබදව මෙහි දී අවධානය යොමු විය.
ශ්‍රී ලංකාවේ තරුණ සංවර්ධනයට අවශ්‍ය සහයෝගය ලබාදෙන බවත්, ඉදිරියේ දී තරුණ කටයුතු සම්බන්ධව ශ්‍රී ලංකාව සමඟ එක්ව කටයුතු කිරීමට ඉන්දියාව බලාපොරොත්තු වන බවත් ඉන්දීය තරුණ කටයුතු සහ ක්‍රීඩා අමාත්‍ය මන්සුඛ් මන්දාවියා මහතා ප්‍රකාශ කළේය.
බිම්ස්ටෙක් තරුණ සමුළුවට සත්කාරකත්වය දැක්වීම පිළිබඳව ඉන්දියාවට ස්තූතිය පළ කරන බව තරුණ කටයුතු නියෝජ්‍ය අමාත්‍ය එරංග ගුණසේකර මහතා මෙහි දී පැවසුවේය.
ඉන්දියාවේ ගුජරාටි ප්‍රාන්තයේ , අහමදාබාද් හි පැවැත්වෙන බිම්ස්ටෙක් තරුණ සමුළුවට සහභාගී වීම සඳහා තරුණ කටයුතු නියෝජ්‍ය අමාත්‍යවරයා ඇතුළු පිරිසක් ඉන්දියාව වෙත ගිය අතර, එම සමුළුව අතර මෙම සාකච්ඡාව සිදු විය. සමුළුව පෙබරවාරි 11 වෙනිදා දක්වා පැවැත් වේ.
