ඇඹිලිපිටිය පොලීසියේ 12 දෙනෙකු මාරු කර දෙදෙනකු අනිවාර්ය නිවාඩු යවා ඇතැයි තලතා අතුකෝරාළ ඇමතිනිය ඇඹිලිපිටියේ උද්ඝෝෂණ කරුවන්ට අද සන්ද්යාවේදී කීවාය. ඔරලෝසු කණුවේ පඩියකට නාග තවත් කරුණු පැහැදිලි කරන්නට සූදානම් වෙද්දී සෙනග අතරින් හූ හඬක් ආවේය. ජාතික හෙළ උරුමයේ නායක ඕමල්පේ සෝභිත නාහිමියෝ ඉන් පසුව එහි වැඩම කර උද්ඝෝෂණ කරුවන් අමතමින් උද්ඝෝෂණය නතරකරන්නැයි ඉල්ලා සිටියහ. නැවත හූ හඬ නැගී ආවේය.
උදේ උද්ඝෝෂණයට සිටි පිරිසට වැඩි පිරිසක් ඔරලෝසු කණුව අසලට පැමිණ සිටින බව නගර වැසියෝ කියති. පොලිස් විශේෂ කාර්ය බළකායද එහි කැඳවා ඇත.
උද්ඝෝෂකයන් පවසනුයේ පොලීසිය මාරු කිරීමෙන් වැඩක් නැති බවයි. ඔවුන් අත් අඩංගුවට ගන්නා තුරු උද්ඝෝෂණය අවසන් නොකරන බව ඔවුහු කීහ.
