සිත්ති මර්ලියා ගේ කතාව ම පුවත්පතකට ලිවේ මීට වසර දෙකකටත් කලිනි. ඒ ඇය රිය අනතුරට ලක්වී රෝහල් ගත කළ කාලයේදීමයි.
ඇය දෙදරු මවකි. මීට වසර 10 කට පෙර ඇයගේ සැමියා මිය ගියේය. ඇය පදිංචිව සිටියේ සැමියාගේ නංගිගේ ගෙදරය. දරුවන්ගේ ඉගනීමේ කටයුතුත් ආර්ථික අහේනියත් නිසා කොළඹ විදේශ රැකියා ආයතනයකින් ඇය සෞදි අරාබියේ රියාද් නුවර ගෘහ සේවිකාවක් ලෙස පැමිණියේ මීට වසර හතර හමාරකට කලිනි.
සෞදි හාම්පුතා කාන්තාවන් නිවෙස් වලට මුදලට විකිණීමේ ජාවාරමක් කරනබව දැනගත්තද ඔහුට අවනත වීම හැර සිත්ති මර්ලියාටද කළ හැක්කක් නොවූ තැන වසර 5 ක් තිස්සෙම විවිධ නිවෙස්වල බැලමෙහෙවර කම් කිරීමට සිදුවිය. මෙසේ රැකියාව කරමින් සිටියදී යේමන් ජාතික පවුලක් සමග අභා බලා ආවේ රාමසාන් සමයේය. මෙසේ රාමසාන් උත්සවය අවසන්වී නැවත රියාද් බලා පිටත්වූ සිත්ති මර්ලියා ඇතුළු යේමනි පවුල අභා සිට පැයක පමණ දුරක් යාමට මත්තෙන් කමිස් මුසායඩ් රියාද් මාර්ගයේදී බිහිසුණු රිය අනතුරකින් ඉන්දියා ජාතික රියදුරු, යේමන් පවුල වසර පහක පිරිමි දරුවා සහ ඉතියෝපියා ජාතික ගෘහ සේවිකාවද එතනම මරුමුවට පත්වූහ. බේරුණේ ශ්රී ලාංකික සිත්ති මර්ලියා පමණී. ඒ 2012 ජුලි 16 දිනයි. එදා සිට මේදක්වා කමිස මුසයිඩ් රෝහලේ එකම ඇඳක නේවාසිකව ප්රතිකාර ලබන මර්ලියා හට ඊයේ (18) දින තම මව්බිමට යාමට වාසනාව උදාවුයේ අභා නගරයේ ක්රියාත්මක වන අබු කුලිසාන් රාජ්ය නොවන සංවිධානයේත් කමිස් රෝහලේ බලධාරීන්ගේත් සහ එහි වෙසෙන ශ්රී ලාංකිකයින්ගේ බලවත් ප්රයත්නයෙන් බව එහි වෙසෙන නිමල් එඩේරමුල්ල මහතා පවසයි .
කෙසේ වුවද මෙම කාන්තාව අබා ගුවන් තොටුපොලෙන් රියාද් දක්වාද එතැන් සිට සෞදි අරාබියා ගුවන් යානයකින් ශ්රී ලංකාවටද පියාසර කළ බව වාර්තාවේ. වසර තුනක් පමණ විවිධ දුෂ්කරතා මධ්යයේ රෝහලේ නේවාසිකව ප්රතිකාර ලැබූ සිත්ති මරලියා පැවසුවේ අබු කුලිසාන් නමැති රාජ්ය නොවන සංවිධානයේ පිහිට නොලබන්නට තමාට අත්වන ඉරණම කුමක්දැයි සිතාගත නොහැකි බවයි. තමා ශ්රී ලංකා රජයේ බලධාරීන් පිළිබඳව දැඩි කලකිරීමෙන් පසුවන බවත් ඇය පවසන්නීය.
මෙම කාන්තාව පිළිබඳව සොයා බලා අවශ්ය ප්රතිකාර ලබා දීමට කටයුතු කරන බව කටුනායක ගුවන් තොටුපොළේ සහන පියස නිලධරයෝ පොරොන්දු වූ බවද නිමල් එඩේර මුල්ල මහතා පවසයි.
