අද අලුයම 12.38ට අලුත්ගම දී දුම්රිය දෙකක් ගැටී ඇතැයි දුම්රිය දෙපාර්තමේන්තු ආරංචි මාර්ග කියයි.

අලුයම 3.50ට පමණ හලාවත බලා පිටත් වීමට නියමිත දුම්රිය අලුත්ගම දුම්රිය ස්ථානයේ දෙවැනි වේදිකාවේ නවතා තිබිය දී මුහුදු බඩ මාර්ගයේ පැමිණි තෙල් දුම්රියක් නවතා තිබූ දුම්රියේ පිටුපස ඇන්ජිමේ ගැටී ඇත.

අනතුරෙන් රියදුරකු පමණක් සුළු තුවාල ලබා ඇතැයි ද, දුම්රිය මැදිරි කිහිපක් පීලි පැන ඇතැයි ද කියති.

පොලිස් මාධ්‍ය ප්‍රකාශක කාර්යාලය පැවසුවේ එවැනි සිද්ධියක් වාර්තා වූ බවයි. ඒ ගැන සොයා බැලීමට පොලිසිය එම ස්ථානයට ගොස් ඇතැයි ද පොලිසිය පවසයි.

මෑතක දී දුම්රිය අනතුරු කිහිපයක් වාර්තා විය.

පසුගිය ඉරිදා රාත්‍රී 11ට පමණ උතුරේ පලෙයි සිට කොළඹ බලා පැමිණි රාත්‍රී තැපැල් දුම්රිය අනුරාධපුරයේ දී  පීලි පැන්නේය. වෙනත් දුම්රිය ඇංජිමකින් මැදරි ආපස්සට ඇද පීලි ගත කළ අතර එම දුම්රිය කොළඹ බලා පිටත් වුයේ  අලුයම 1.30 ට පමණය.

කොළඹ සිට පලෙයි බලා ගිය යාල් දේවී දුම්රියේ  මැදිරි දෙකක්  ගැලවී වව්නියා මුන්ඩ්මුරිප්පුවේ දී  මීටර් තුන්සීයක් පමණ දුරට ඇදී ගියේ පසුගිය හතර වැනි දා ය.

අප්‍රේල් 30 වැනි දා පොතුහැර දුම්රිය ස්ථානයේ නතරකැර තිබූ දැයටකිරුළ දුම්රියේ රජරට රැජන දුම්රිය ගැටී මගීහු විශාල පිරිසක් තුවාල ලැබූහ. අනතුරින් පසු පස් දෙනකුගේ වැඩ තහනම් කැරිණි.

රියදුරකු නොමැතිව දුම්රිය ඇන්ජිමක් ධාවනය වූ සිද්ධියක් මීට මාස කිහිපයකට පෙර වාර්තා විය.