දෙවැනි වරටත් හැඬවෙන මංගල සීනුව ගැන වාර්තාවන ඕපාදූප ගැන තුට්ටුවකටවත් මායිම් නොකළ ට්‍රම්ප් දහසකට ආසන්න සම්භාවනීය අමුත්තන් පිරිසක් මධ්‍යයේ 1993 වසරේදී මාර්ලා මේප්ලස් සමඟ නව ජීවිතයකට එළැඹෙන්නේ තවත් අලුත් බලාපොරොත්තු රැසක් ගැන හීන දකිමිනි. ට්‍රම්ප්ගේ දෙවැනි විවාහක බිරිඳ වූ මාර්ලා ඒ වනවිටත් ට්‍රම්ප් නිසා දියණියක බිහිකර සිටියාය.
දෙවැනි වරටත් ජයටම මඟුල් කෑ ට්‍රම්ප් ඒ වනවිට නිව්යොර්ක් නගරය පුරා ප්‍රචලිත ප්‍රකෝටිපති ව්‍යාපාරිකයෙකු වූයේය. ට්‍රම්ප්ට තරම් නිශ්චල දේපළ සමූහයක් නිව්යෝර්ක් නගරයේ කාටවත් අදටත් නැත. ඔහුට අයත් හෝටල්, තට්ටු නිවාස සංකීර්ණ සහ මාළිගා වැනි කැසිනෝ ශාලා නිව්යොර්ක් නගරයේ හැම තැනකම ඇත. හිලරි ක්ලින්ටන්ට සහ බිල් ක්ලින්ටන්ට වඩා සල්ලි තිබෙන කළමනාකරුවන් දහස් ගණනක් ට්‍රම්ප්ගේ සමාගම්වල ඔහු යටතේ සේවය කරති.
නමුත් මේ දිගු කාලයක සිට ව්‍යාපාරික ලෝකයේ වැජඹුන ට්‍රම්ප්ගේ හෝටල් සහ කැසිනෝ ව්‍යාපාරය හයවතාවක් බංකොලොත් විය.ඒ 1991 සහ 2009 අතර කාලය තුළඳීය. එහෙත් ඔහු හත්වැනි වතාවේදී කෙළින් සිටගෙන කැසිනෝ සහ හෝටල් ව්‍යාපාරය යළි කවදාවත් නොවැයෙන ලෙස තහවුරු කර ගත්තේය.
කෙතරම් කාර්යබහුල වුවද, වරින් වර විවිධ කාලයෙන් කාලයට ඩොනල්ඞ් ට්‍රම්ප් විවිධ භූමිකාවන් නිරූපනය කළ බව නොරහසකි. නිරන්තරයෙන් බහුවිධ කාර්යයන්හි නිරත වීමට උපන් හපනෙකු වූ ට්‍රම්ප්ගේ භූමිකාව තවත් ඔබ්බට යන්නකි.
ඩොනල්ඞ් ට්‍රම්ප් සාර්ථක ව්‍යාපාරිකයෙකි. ඔහු සාර්ථක ව්‍යාපාරිකයකු බවට පත්වූයේ දේපළ වෙළෙඳාම් ක්ෂේත්‍රයෙනි. ඒ, පියාගෙන් උරුමවුණු දේපළ වෙළෙඳාම් සමාගම ඉදිරියට ගෙන යමිනි. දේපළ මිලදී ගැනීම්, විකිණීම් මෙන්ම ඉදිකිරීම් වැඩ සම්බන්ධයෙන් නිව්යෝක් නුවරත්, නිව්යෝක් ජනපදයේත් ට්‍රම්ප්ගේ සමාගම් ප්‍රමුඛත්වයක් ගෙන සිටී. ඩොනල්ඞ් සාර්ථක ව්‍යපාරිකයකු යැයි බොහෝ දෙනාගේ මතයයි. මේ වනවිට ඔහුගේ වත්කම්වල වටිනාකම අමෙරිකන් ඩොලර් බිලියන 4.5ක් යැයි පැවැසෙයි.
දේපළ වෙළෙඳාම් කටයුතුවලට පරිබාහිරව, රූපවාහිනී රියැලටි වැඩසටන් නිර්මාණකරුවකු ලෙස ද ඩොනල්ඞ් ට්‍රම්ප් ප්‍රකටය. ඇප්රෙන්ටිස් යනු එවැනි රියැලටි වැඩසටහනකි. තරුණ දක්ෂ ව්‍යාපාරිකයකු තෝරා, ඔහුට හෝ ඇයට ඉහළ රැකියා අවස්ථාවක් උදා කරදීම ඇප්රෙන්ටිස් රියැලටි වැඩසටහනේ අරමුණය. මෙහිදී තරගකරුවන්ට දැඩි පීඩනයක් යටතේ (ඩොනල්ඩ් ට්‍රම්ප්ගෙන් විවේචන සහ බැණුම් මැද) එකිනෙකා පරයා තරග කර ජයග්‍රහණය කිරීමට සිදුවෙයි. ඇප්රෙන්ටිස් වැඩසටහනේ ප්‍රධාන විනිසුරු ලෙස කටයුතු කරන්නේ ඩොනල්ඞ්මය.
ඊට අමතරව ඩොනල්ඞ් ඇමෙරිකන් රූපවාහිනී මාලා නාට්‍ය වලත් හොලිවුඩ් චිත්‍රපටවලත් සුළු චරිත නිරූපණය කර ඇත. ඒ හෝම් අලෝන්, සෙක්ස් ඇන්ඞ් ද සිටී, ටූ වීක්ස් නෝටිස් රූපවාහිනී කතා සහ චිත්‍රපටයන්හීය.
රූපවාහිනී වැඩසටහන් අතරින් ඩොනල්ඞ් ට්‍රම්ප් වඩාත් ප්‍රසිද්ධ වී සිටියේ ලෝක රූ රැජින තරගාවලිය සංවිධානය සම්බන්ධයෙනි. ලොව සුරූපිනියම තරුණිය තෝරා ඇය රූ රැජිනක් ලෙස කිරුළු පැළැඳවීමට මැදිහත්ව කටයුතු කළේ ඩොනල්ඞ්ය.
1996 සිට 2015 දක්වා විශ්ව රූ රැජින කරගය, ඇමෙරිකා රූ රැජින තරගය, ඇමරිකා තරුණ යුවතිව තේරීමේ තරගය, ලෝක රූ රැජින කිරුළ තරගාවලි සංවිධානය සම්බන්ධයෙන් අවස්ථා ගණනාවකදී ඩොනල්ඞ්ට සහ ට්‍රම්ප් සමාගමට විවිධාකාරයෙන් දොස් අහන්න සිදුවිය. තමන්ට කැමැති සුරූපිනියන් කිරුළු පළන්ඳනවා යැයි ඩොනල්ඞ්ට චෝදනා එල්ල විය. එක් අවස්ථාවක, ඩොනල්ඞ්ගේ අනුදැනුම මත කොකේන්වලට ඇබ්බැහි වූ තරුණියක කිරුළු පැලැඳීම සිදුවිය. ඒ ඇය මත්ද්‍රව්‍ය භාවිතා කරන තැතැත්තියක බව තහුවරු වීමෙන් ද පසුවය.
ට්‍රම්ප් මෙම නව ගොඩනැගිලි ඉදිකිරීමට එරෙහිව ඊට අල්ලපු ඉඩමේ අයිතිකරුවන්ද, නිවියෝර්ක් කලා සංගමයද, මීට එරෙහිව පෙත්සමක් පවා ඉදිරිපත් කළේය. අන්තිමේදී සියලු දෙනා පැරදී ඩොනල්ඞ් ට්‍රම්ප් ජය ගත්තේය.
මේ සියල්ල මධ්‍යයේ දෙවැනි විවාහ ජීවිතයේ ලබ අත්දැකීම් ලොව හමුවේ ප්‍රසිද්ධ නොකිරීම ඩොනල්ඞ් හැමවිටම වගබලා ගත්තේ, සිය පළමු බිරිඳ නිසා ලැබූ අත්දැකීම් නිසා වෙනි.
ඇත්තටම ඉවානා මෙන් ට්‍රම්ප්ගේ දෙවැනි බිරිය වන මාර්ලා මේප්ල්ස්ගේ ගතිගුණ සමාජයට විවර නොවීය. ඒ විවාහ වීමටත් පෙර ට්‍රම්ප්ට දාව උපත ලැබූ ටිෆානි අරියානා ට්‍රම්ප්, මාර්ලා මේපල්ස් ගේ ජීවිතය වීම නිසා වෙනි.
ට්‍රම්ප් ගේ තවත් අලුත් පිම්මක් ගැන ලබන සතියේ දියත ඔස්සේ.....
