මංගල්‍ය උත්සවවලදී පෝරුවේ චාරිත‍්‍ර ඉටුකිරීම කලක් තිස්සේ කරගෙන ගිය ඔහු මත් වතුරට ලැදි බව ප‍්‍රදේශවාසීන් දැන සිටියත් දුර බැහැර අය දන්නේ නැත.
කඩවසම් පෙනුමත්, සුපිරි ඇඳුම් කට්ටලයත් මුඛරි කතාවත් නිසා ජනප‍්‍රිය වූ ඔහුට මඟුල් පෝරුවක අෂ්ඨක කීමට ඇරියුමක් ලැබුණේ ගමට තරමක් දුර සබරගමුව පළාතේ උප නගරයක් අසල නිවෙසකිනි.

උදේම මඟුල් ගෙදර ගියත් පෝරුවේ නැකත එන තුරුම ඔහු පෙනෙන්නට නොවීය. මොහොතකින් ඥාතියකු ඔහු කැඳවාගෙන ආවේය. එහෙත් ඒ වන විට ඔහු සිටියේ බමන ගතිනි.

පෝරුවේ චාරිත‍්‍ර වාරිත‍්‍ර ඉටු කළත් එහිදී කළ ගායනා විලාසය අමුතු විය. වැඩිපුරම කියැවුණේ මහා ප‍්‍රාණ අකුරුය. ඇතැම් වචන පුනරුච්චාරණය විය. මනාලියගේ පියාට යකා වැහිණි.

 ඔහුගේ ගනුදෙනු පියවා වහාම ආපහු යවන්නැයි පියා කීවේ කෝපයෙනි. ”තවත් මේ වගේ බේබද්දන් මේවට ගාව ගන්න එපා” යැයි ඔහු කීවේය. ”මේ වගේ හිඟන මඟුල් ගෙවල්වල මාත් එන්නේ නැහැ”යි ඔහුත් කීවාලූ.