(කෑගල්ල අධිකරණ චමින්ද වැවතැන්න)
කකුලේ සෑදි තිබූ තුවාලයට ප්‍රතිකාර ලබාගැනීමට සබරගමු පළාතේ රෝහලක බාහිර රෝගී අංශයට ගිය සිවුදරු මවකට වෛද්‍යවරයා සිය ජංගම දුරකතනයේ ඇමතුමකට පිළිතුරු දෙමින් වැරැදි ඖෂධයක් නියම කර ඇතැයි කියන සිද්ධියක් සම්බන්ධයෙන් පුවතක් කෑගල්ල ප්‍රදේශයෙන් වාර්තා වේ.
සිද්ධිය මෙසේය.
ප්‍රතිකාර ගැනීමට ගිය සිවුදරු මව රබර් කිරි කපන කාන්තාවකි. මෙම දිනවල ඇදහැලෙන ධාරාණිපාත වර්ෂාපතනය හේතුවෙන් කිරි කැපීමට නොහැකිවීම හේතුවෙන් වතු බලධාරීන් කිරි කපන්නන්ට වත්තේ සිල්ලර වැඩ දී ඇති බව ද වාර්තා වෙයි.
ඉකුත් දිනක වත්තේ සිල්ලර වැඩ කරමින් සිටි පිරිසකගෙන් එක් කාන්තාවකගේ කකුලක මතුපිට තුවාල ගණනාවක් හට ගැනිණ. සම්පූර්ණයෙන්ම ඇවිදයාමටද නොහැකි වන අයුරින් කකුල ඉදිමීයාමෙන් සෙසු සේවක පිරිස ප්‍රකාශ කර ඇත්තේ කකුලේ පිට පැත්තේ යම් දෙයක් ගෑවෙන්නට හෝ මිය ගිය සතෙකුගේ ශරිර කොටස් ඇනෙන්නට ඇති බවය.
පසුව නිවෙසට පැමිණ ඇති සිවුදරු මව ඉකුත් 26 දා සිය ස්වාමි පුරුෂයා සමඟ පෙරවරුවේ කකුලක පිටි පතුලේ හටගෙන තිබූ තුවාලවලට ප්‍රතිකාර ලබාගැනීමට කෑගල්ල ප්‍රදේශයේ රෝහලක බාහිර රෝගි අංශයට දිව ගියාය.
නියමිත වේලාව පැමිණිමෙන් පසුව රෝගී කත තුවාල පෙන්වා ප්‍රතිකාර ලබාගැනීමට වෛද්‍යවරයෙකු වෙත ගියාය. රෝගි කත සිය අසනීප තත්ත්වයන් වෛද්‍යවරයා වෙත ප්‍රකාශ කිරීම ආරම්භ කරනවාත් සමඟම වෛද්‍යවරයාගේ අත තිබූ ජංගම දුරකතනයට තවත් රෝගියකු සම්බන්ධයෙන් විමසා සිටීමට ඇමතුමක් ආ බව රෝගි කත පැවසුවාය. පසුව දුරකතනයට පිළිතුරු දෙමින් රෝගි කාන්තාවගෙන් ද වෛද්‍යවරයා සුවදුක් විමසා බලා තුණ්ඩුවේ ඖෂධ නියමකර පිටත් කර යවා ඇත.
පසුව රෝගී කත වෛද්‍යවරයා නිර්දේශ කරදී තිබු තුණ්ඩුව ඖෂධ නිකුත් කරන්නාට භාර දී තිබුණි. තුණ්ඩුව කියවා බැලු ඖෂධවේදියා රෝගී කතගෙන් ප්‍රතිකාර ලබා ගැනීමට පැමිණි කාරණාව පිළිබද විමසා ඇත. එහිදී රෝගී කත සිය විස්තරය සම්පූර්ණයෙන්ම ඖෂධවේදියා හමුවේ ප්‍රකාශ කළාය. පසුව ඖෂධවේදියා රෝගී කතට ප්‍රකාශ කර ඇත්තේ වෛද්‍යවරයා විසින් නිර්දේශ කර ඇත්තේ වෙනත් ඖෂධ වර්ග කිහිපයක් බවත් වහාම ගොස් වෛද්‍යවරයා මුණ ගැසී අසනීප තත්ත්වය පිළිබඳ ප්‍රකාශ කර නියම කර ඇති ඖෂධ ද වෙනස් කරගෙන පැමිණෙන ලෙසත්ය.
ඉන්පසු වෛද්‍යවරයා යළි රෝගි කතගෙන් අසනීප තත්ත්වය පිළිබඳ විමසා බලා නිර්දේශ කර තිබූ ඖෂධ කපා ඉවත්කර නව ඖෂධ වර්ග කිහිපයක් සටහන් කර කෙටි අස්සනක් ද යොදා තුණ්ඩුව යළි රෝගි කතට භාරදී ඇත. පසුව රෝගී කත යළි ඖෂධවේදියා වෙත ගොස් ඖෂධ ටික ලබාගැනීමට පෙර විමසා ඇත්තේ වෛද්‍යවරයා පෙර ලියා තිබුණේ කුමන අසනීපයකට ද යන්න පිළිබඳවය. එහිදී ඖෂධවේදියා රෝගි කතට කිසිවක් ප්‍රකාශ කර නොමැත. ඖෂධ ටික රැගෙන නිවෙසට පැමිණි ඇය වෛද්‍යවරයාට වැඩ වැරදුණු බවත් ඖෂධවේදියා නිසා තමන් බේරුණු බවත් සිය සැමියාට සිනාමුසු මුහුණින් පැවසුවාය.
