ශ්‍රී ලංකා ප්‍රමිති ආයතනය (SLSI) විසින් පවත්වනු ලබන, ආයතනික විශිෂ්ටත්වය සඳහා ශ්‍රී ලංකාවේ විශිෂ්ටතම සම්මාන උළෙල වන ශ්‍රී ලංකා ජාතික තත්ව සම්මාන 2023 (SLNQA) හිදී, හලාල් කවුන්සිලය (HAC) කුසලතා සම්මානයකින් පිදුම් ලැබීය.
මෙම සම්මාන ප්‍රදානෝත්සවය විද්‍යා හා තාක්ෂණ අමාත්‍යමහාචාර්ය ක්‍රිෂාන්ත අබේසේන මහතාගේ ප්‍රධානත්වයෙන් පසුගියදා පැවැත්විණි. ගුණාත්මකභාවය, නවෝත්පාදනය සහ අඛණ්ඩ වැඩිදියුණු කිරීම් සඳහා කැපවෙන රාජ්‍ය හා පෞද්ගලික අංශයේ සංවිධාන ඇගයීම මෙම උත්සවයේදී සිදු කෙරිණි.
මෙම සම්මානය පිළිබඳ HAC හි අධ්‍යක්ෂ සහ ප්‍රධාන විධායක නිලධාරී ආකිෆ් වහාබ් මහතා මෙසේ ප්‍රකාශ කළේය. “මෙම සම්මානය, අපගේ සමස්ත කණ්ඩායමේ කැපවීම සහ වෘත්තීයභාවය උදෙසා කරන ලද උපහාරයකි. එය ජාත්‍යන්තරව පිළිගත් සහතිකකරණ ප්‍රමිති තහවුරු කිරීමට HAC සතු කැපවීම යළිත් තහවුරු කරයි. මෙම ප්‍රයත්නවලින් ශ්‍රී ලාංකීය හලාල් සහතික ලත් ආහාර පාන නිෂ්පාදකයන්, ආහාර සුරක්ෂිතතාව සහ ගුණාත්මකභාවය අඛණ්ඩව තහවුරු කරමින්, දේශීය හා ගෝලීය වශයෙන් පාරිභෝගිකයන්ට සේවය සැපයීමට සූදානම්ව සිටියි.”
දේශීය හා ජාත්‍යන්තර වෙළෙඳපොළ සඳහා හලාල් ප්‍රමිතීන්ට අනුකූලව ශ්‍රී ලාංකීය නිෂ්පාදන සහතික කිරීමේදී HAC ප්‍රධාන කාර්යභාරයක් ඉටු කරයි. කවුන්සිලයේ ශක්තිමත් තක්සේරු පද්ධති සහ ISO පාදක කරගත් ප්‍රමිති නිසා ශ්‍රී ලාංකීය නිෂ්පාදකයන්ට නව ගෝලීය වෙළෙඳපොළට ප්‍රවේශ වීමට සහ සහතික ලත් භාණ්ඩ පිළිබඳ පාරිභෝගික විශ්වාසය ඉහළ නැංවීමට උපකාරී වී ඇත.
2024 වසරේදී, ශ්‍රී ලංකාවේ හලාල් සහතික ලත් නිෂ්පාදන අපනයනය ඇමරිකානු ඩොලර් බිලියන 1.9ක් ලෙස ඇස්තමේන්තු කර ඇති අතර, එය සමස්ත ආහාර හා පාන අපනයනයෙන් සියයට 63ක් සහ ජාතියේ සමස්ත අපනයනයෙන් සියයට 16ක් නියෝජනය කරයි. මෙම දායකත්වය රටේ අපනයන ආර්ථිකය ඉදිරියට ගෙන යාමේදී විශ්වසනීය සහතිකකරණයෙහි වර්ධනය වන වැදගත්කම අවධාරණය කරයි.