ලෙඩ රෝග වැළඳුණු පමණින්ම සුව වන්නේ නැත. රෝගාබාධවලට ගොදුරු වීම පහසු වුවද ඒ මාර්ග අසුරා තැබීම ඊටත් වඩා ලෙහෙසිය.

තම මුදල් වැය නොකොට ,කිසිඳු ඖෂධයක භාවිතයක් නැතුව කාලය ගෙන හොඳින් සිතා බලා අපේ ජීවන රටාව පහත පුරුදුවලින් පුරවා ගතහොත් ඒ පුරුදු ක්‍රියාත්මක කළහොත් ඔබ අප මෙන්ම සමාජයක්ම ලබන ප්‍රතිලාභය ගැන අමුතුවෙන් කිව යුතු නැත.

අද අපි දැන ගනිමු ,ඖෂධ ගබඩාවලත් නැති ඖෂධ මොනවාද , එකී ඖෂධ භාවිත කරන්නේ කොහොමද කියන කාරණාව.

♦ ව්‍යායාමය , උපවාසය ,පවුලේ අය සමඟ එකට ආහාර ගැනීමත් හොඳ ඖෂධ තුනකි. සිරුර නිරෝගීව තබන මෙම ඖෂධවලට මුදල් අවශ්‍ය නොවේ. අවැසි වනුයේ කාලය පමණි.

♦ සිනහව සහ හාස්‍යයද වටිනා ඔසුවකි. මේ ද්විත්වය එක්තැන් වූ කල දුක් වීමට හේතුවක් නිර්මාණය නොවනු ඇත. සිත සතුටින් ඇති තාක් ලෙඩ රෝගවලට ඉඩක් නැත.

♦ ගැඹුරු නින්දද හොඳ ඖෂධයකි. කඩින් කඩ ඇහැරෙන නින්දකට වඩා එක දිගට ගන්නා සැප නින්ද මනසට මනා විවේකයකි.

♦ සියලුම දෙනා සමඟ සුහදව සිටීම, සතුටින් සිටීමට තීරණය කිරීම මෙන්ම මනසෙහි ධනාත්මක සිතුවිලි ඇති කර ගැනීමද බොහෝ රෝගවලට ඇති ප්‍රතිකර්මයකි. සතුටින් සිටීමට හේතු කාරණා සොයා ගත යුත්තේද අප විසිනි. ඔබ ගැන වඩා හොඳින් දන්නේ ඔබම නිසා තමාව සතුටු කළ හැක්කේද තමාටමය. සතුටින් විසීමට හැකි හේතු කාරණා සොයා යාමත් අසුබවාදී සංකල්ප බැහැර කර ධනාත්මකව සිතුම් පැතුම් අවදි කර ගත හැක්කේත් තමාටමය.

♦ සියලුම දෙනාට යහපත පැතීමත් ඖෂධයකි.

♦ සමහර විට නිශ්ශබ්දතාව පවා ඔසුවකි.

♦ ආදරය හොඳම බෙහෙතකි.

♦ සිතේ ශාන්තිය ඖෂධයකි.

♦ සෑම හොඳ මිතුරකුම පරිපූර්ණ ඖෂධ ගබඩාවකි.

-සටහන- මාධවී ධර්මරත්න