ගාසා තීරයේ ක්‍රියාත්මක හමාස් සහ අනෙකුත් සන්නද්ධ කණ්ඩායම් "සම්පූර්ණයෙන්ම නිරායුධ කිරීම" සඳහා  සාම සැලැස්ම යටතේ එකඟතාවකට එළඹී ඇති බව එක්සත් ජනපද ජනාධිපති ඩොනල්ඩ් ට්‍රම්ප් පවසයි.

ගාසා තීරයේදී සම්පූර්ණයෙන්ම නිරායුධ වීමට අදාළ සාම සැලැස්මට තමන් එකඟ වූ බවත්, ඒ පිළිබඳ නිල ප්‍රකාශයක් ළඟදීම නිකුත් කරන බවත් හමාස් ජ්‍යෙෂ්ඨ නිලධාරියෙකු බීබීසී (BBC) පුවත් සේවයට පවසා තිබේ. ඊශ්‍රායලය මේ සම්බන්ධයෙන් මෙතෙක් කිසිදු අදහසක් පළ කර නොමැත.

"නිරායුධ කිරීමේ ක්‍රියාවලිය අවසන් වීමත් සමඟ" ඊශ්‍රායලය ගාසා තීරයෙන් ඉවත් වන බව පැවසූ ට්‍රම්ප්, මෙම  එකඟතාව "අවසානයේදී නව පලස්තීන රජයක් යටතේ ගාසා තීරය පාලනය වීම සඳහා තැබූ තීරණාත්මක පියවරක්" ලෙස හැඳින්වීය.

එක්සත් ජනපදයේ මැදිහත්වීමෙන් සකස් කළ ගාසා සටන් විරාම සැලැස්මේ දෙවන අදියරට හමාස් සංවිධානය නිරායුධ කිරීම ඇතුළත් වේ. එම දෙවන අදියරට ගාසා තීරය ප්‍රතිසංස්කරණය කිරීම ද ඇතුළත් වේ.

Truth Social හි සටහනක ජනාධිපති ට්‍රම්ප් මෙසේ පැවසුවේ නිරායුධකරණය අවසන් වූ පසු, ඊශ්‍රායල හමුදා ඉවත් වනු ඇති බවත් , ගාසා තීරය එහි පදිංචිකරුවන්ට සහ එහි අසල්වැසියන්ට ආරක්ෂිත වීම සඳහා වගකීම භාර ගැනීම සඳහා ජාත්‍යන්තර ස්ථායිකරණ බලකාය නව පලස්තීන පොලිස් බලකායක් සමඟ කටයුතු කරනු ඇති බවයි. 

මේ සඳහා මැදිහත්කරුවන් වශයෙන් කටයුතු කළ ඊජිප්තුව, කටාර් සහ තුර්කියට ජනපතිවරයා ස්තූති කළේය.