(අංජුල මහික වීරරත්න)

විනිසුරු විශ්‍රාම වයස වැඩි කිරීමේ තීරණය හරිද?වැරදිද? කියා විනිශ්චය කිරීමට ජනතා අධිකරණයට බාරදිය යුතු බව ඒකාබද්ධ විපක්ෂයේ කැඳවුම්කරු හිටපු අමාත්‍ය මහාචාර්ය ජී.එල්. පීරිස් මහතා මාධ්‍ය හමුවකදී පැවසීය.

ශ්‍රේෂ්ඨාධිකරණයේ වැඩ කටයුතු වලට බ්‍රිතාන්‍ය කිරීටය වත් ඇඟිලි නොගැසූ බවද පීරිස් මහතා කීය.

කොළඹ මල් පාර දේශපාලන කාර්යාලයේ පැවැති මෙම මාධ්‍ය හමුවේදී වැඩි දුරටත් අදහස් දැක්වූ ජී.එල් පීරිස් මහතා:-

ඒ කාලයේ පවා බ්‍රිතාන්‍ය කිරීටය නියෝජනය කරපු ආණ්ඩුකාරතුමා කිසිම විදියකට  ශ්‍රේෂ්ඨාධිකරණයේ වැඩකටයුතු සම්බන්ධයෙන් අත පෙවීමට උත්සාහ දැරුවේ නැහැ. ශ්‍රේෂ්ඨාධිකරණයේ ගරුත්වයට හා ස්වාධීනත්වයට සම්පූර්ණ සැලකිල්ල දැක්වූවා.

හැබැයි අද අවාසනාවකට මෙන්,  ශ්‍රේෂ්ඨාධිකරණය තමන්ගේ ග්‍රහණයට නතු කර ගැනීමට වර්තමාන රජය උත්සාහ දරනවා.දේශපාලන හස්තයක් මාර්ගයෙන් අධිකරණයේ කටයුතු හැසිරවීමට සැලසුම් සහගත විධිමත් උත්සාහයක් ගන්නා බව තමයි අද අපි ඇස් පනාපිට දකින්නේ. ඒක කිසිසේත් අතිශයෝක්තියක් නෙවෙයි.

පෙර අපර දිග සියලුම නීති පද්ධති ඉතිහාසයේ ආරම්භයේ සිට ගරු කරපු එක මූලධර්මයක් තියෙනවා. ඒ තමයි තමන්ගේම නඩුව තමන්ට අහන්න බැරිය කියන ප්‍රතිපත්තිය. ඒ කියන්නේ විනිශ්චයකාරවරයෙකුට යම්කිසි බැඳීමක් තියෙනවා නම්, එවන් අවස්ථාවකදී නඩුව අහන්න සදාචාරාත්මක හෝ නීතිමය අයිතියක් නැහැ යනුවෙන් ද  ජී.එල්.පීරිස් මහතා පැවැසීය.