(මනෝ ප්‍රිය ගුණසේකර)

පාස්කු ඉරිදින කතෝලික පල්ලි හා තරු හෝටල් ඉලක්ක කරගෙන මරාගෙන මැරුණ බෝම්බ ප්‍රහාරයක් එල්ල කර අහිංසක පුරවැසියන් 250කට අධික පිරිසක් මරුමුවට පත් කර තවත් විශාල පිරිසකට බරපතල තුවාල කිරීම සඳහා ආධාර අනුබලදීම සම්බන්ධයෙන් චෝදනා ලැබ සිටින මවුලවිවරුන් ඇතුළු 25 දෙනාගෙන් විත්තිවාසික කැඳවීමට කොළඹ ස්ථීර ත්‍රිපුද්ගල මහාධිකරණ මිනිසුරු මඩුල්ල අද තීරණය කළේය.

විත්තිකරුවන්ගෙන් විත්තිවාචක කැඳවීමට තරම් ප්‍රබල නඩුවක් පැමිණිල්ල විසින් ඉදිරිපත් කර ඇතැයි තීරණය කර ත්‍රිපුද්ගල මහාධිකරණ විනිසුර මඩුල්ල විත්ති වාචක ඉදිරිපත් කරන ලෙස විත්තිකරුවන්ට නියම කළේය.

වසර හතරක පමණ කාලයක් පුරා පැවති දීර්ඝ නඩු විභාගයකින් අනතුරුව පැමිණිල්ල වෙනුවෙන් සාක්කි ඉදිරිපත් කිරීම අවසන් කරන බව පැමිණිල්ල වෙනුවෙන් පෙනී සිටි අතිරේක සොලිස්ටර් ජෙනරාල් ජනාධිපති නීතිඥ හරිප්‍රියා ජයසුන්දර මහත්මිය දැනුම් දීමෙන් අනතුරුව පැමිණිල්ලේ සාක්කි විභාගය අවසන් කිරීමට විනිසුරු මඩුල්ල තීරණය කළේය.

මහාධිකරණ විනිසුරුවරුන් වන වරත්න මාරසිංහ (සභාපති) සුජීව නිස්සංක සහ රාමනාදන් කන්නන් යන මහත්වරුන්ගෙන් සැදුම්ලත් තිපුද්ගල මහාධිකරණ විනිසුරු මඩුල්ල හමුවේ මෙම නඩුව විභාග කෙරේ.

2019 අප්‍රේල් මස 21 වැනිදා හෝ ඊට ආසන්න දිනයක කොළඹ ඇතුළු ප්‍රදේශ කිහිපයක ට කතෝලික දේවස්ථාන සහ තරු හෝටල් ඉලක්ක කර ගෙන මරාගෙන මැරෙන බෝම්බ ප්‍රහාර මාලාවක් එල්ල කර අහිංසක මිනිසුන්  මරා දැමීමට හා  මරා දැමීමට තැත් කිරීමට ආධාර අනුබල දුන් බවට චෝදනා 23270 ක් යටතේ විත්තිකරුවන්ට එරෙහිව නීතිපතිවරයා නඩු පවරා තිබිණි.

නෞපර් මවුලවි, සාජිත් මවුලවී, සහ මව්විවරුන් ඇතුළු පුද්ගලයින් 25 දෙනෙකුට එරෙහිව නීතිපතිවරයා විසින් මෙම නඩුව පවරා තිබූ අතර නඩුව විභාග කිරීමට පෙර එක් විත්තිකරුවකු මිය යෑම නිසා ඔහු නොමැතිව නඩුව විභාග කෙරිණි.

2022.10.21 වැනිදා විත්තිකරුවන්ට එරෙහි අධි චෝදනා පත්‍ර භාරදුන් ත්‍රිපුද්ගල මහාධිකරණ විනිසුරු මඩුල්ල 2022.09.15 ඔවුන්ට එරෙහි චෝදනා කියවා තේරුම් කර දෙනු ලැබීය.

අදාළ චෝදනාවන්ට තමන් නිවැරදිකරුවන් බව විත්තිකරුවන් විවෘත අධිකරණයේ පැවසීමෙන් අනතුරුව 2023.10.10 වැනිදා විත්තිකරුවන්ට එරෙහි පැමිණිල්ලේ සාක්කි විභාගය ආරම්භ කෙරිණි.

එතැන් සිට දින 547 ක කාලයක් පුරා විත්තිකරුවන්ට එරෙහි සාක්කි විශාල ප්‍රමාණයක් නීතිපතිවරයා නියෝජනය කරමින් පැමිණිල්ල වෙනුවෙන් පෙනී සිටි අතිරේක සොලිස්ටර් ජනරාල් ජනාධිපති නීතිඥ හරිප්‍රියා ජයසුන්දර මහත්මිය අධිකරණය හමුවේ මෙහෙයවනු ලැබූ අතර නඩු භාණ්ඩ වශයෙන් පශ්චාත් මරණ පරීක්ෂණ වාර්තා ඇතුළු ලේඛන විශාල ප්‍රමාණයක් අධිකරණයට ඉදිරිපත් කෙරිණි.

පැමිණිල්ල වෙනුවෙන් සාක්කි විමසීම අවසන් කරන බව අතිරේක සොලිස්ටර් ජනරාල් ජනාධිපති නීතිඥ හරිප්‍රියා ජයසුන්දර මහත්මිය දැනුම් දීමෙන් අනතුරුව චෝදනා සම්බන්ධයෙන් විත්තිකරුවන්ගෙන් විත්ති වාචක කැඳවීමට තරම් ප්‍රබල නඩුවක් පැමිණිල්ල විසින් ඉදිරිපත් කළ ඇති බව විනිසුරු මඩුල්ල තීරණය කලේය.