(බිමල් ශ්‍යාමන් ජයසිංහ )

70 හැවිරිදි  වයෝවෘද්ධ දෙදරු පියාට පහරදී ගෙල මිරිකා ඝාතනය කර විදේශගතව සිට මෙරටට පැමිණ රහසිගතව සැඟව සිටි කුරුඳු තලන්නෙකු වසර තුනකට පසු අත්අඩංගුවට ගත් බව මනුෂ්‍ය ඝාතන හා සංවිධානාත්මක අපරාධ විමර්ශන අංශය කියයි.

මෙලෙස ඝාතනයට ලක්ව තිබුණේ ගලපිටමඩ දුනුමාල පාර බෝගහහේන අංක සි 47, හි පදිංචිව සිටි  මුණසිංහලගේ පියසේන  යන අයයි.

2021 අප්‍රේල් මස   9 වෙනි දින    සිදු වූ    අදාළ ඝාතනය සම්බන්ධයෙන් එම ප්‍රදේශයේ පදිංචිකරුවකු බවට සැක කළ හැකි පුද්ගලයකු විසින්  අපරාධ පරීක්ෂණ දෙපාර්තමේන්තුවේ නියෝජ්‍ය පොලිස්පතිතුමාට යොමු කරන ලද ලිපියකට අනුව  මනුෂ්‍ය ඝාතන හා සංවිධානාත්මක අපරාධ අංශය මගින් මූලික විමර්ශන සිදුකළ බව පොලිසිය කියයි.

අදාළ ඝාතනය කළ පුද්ගලයා එම ප්‍රදේශයේම පුද්ගලයකු බවට සැක කළ හැකි ප්‍රමාණවත් කරුණු කිසිවක් නොතිබියදී දීර්ඝ විමර්ශනයක් සිදුකර  සැකකරු නිත්‍ය ලෙස හඳුනාගෙන ඔහු පිළිබඳව වැඩිදුරටත් සොයා බැලීමේදී එම පුද්ගලයා විදේශගත වී ඇති බවට අනාවරණය වූ බව පොලිසිය කියයි.

එනමුත් නිලධාරීන් විසින් ඒ සම්බන්ධයෙන් දිගින් දිගටම සිදුකළ විමර්ශනයේදී 2021 වසරේ  ඔක්තෝබර් මස 17 වැනිදා  එම පුද්ගලයා විදේශගත වී 2022 වසරේ සැප්තැම්බර් මස 19 වෙනිදින  මෙරටට පැමිණි බවට ආගමන විගමන දෙපාර්තමේන්තුවෙන් තොරතුරු ලබාගැනීමට හැකි වුවත් සැකකරු මෙරටට පැමිණ ඔහු පදිංචි ප්‍රදේශයෙන් බැහැරව සැඟව සිටින බවට  තොරතුරු අනාවරණය වී යැයි පොලිසිය සඳහන් කරයි.