බංග්ලාදේශයේ ඩකා අගනුවර ඇඟලූම් කම්හලක ඊයේ (25) හටගත් ගින්නකින් 104 දෙනෙක් ජීවිතක්ෂයට පත් වූහ. ගින්නට හසුවී පිළිස්සී තුවාල ලැබීමෙන් සහ දුම් ආඝ‍්‍රාණය වීමෙන් රෝහල් ගත කළ ගණන ද 100 කට වැඩිය. ගින්න හටගත්තේ ඩකා නුවරට කිලෝමීටර 30ක් ඔබ්බෙන් පිහිටි තස්රීන් ෆැෂන් නමැති මහල් නවයකින් යුත් ඇගලූම් කම්හලක බිම් මහලෙනි. එය වේගයෙන් ඉහළට පැතිරී යෑමත් සමඟ ඉහළ මහලවල සිටි සේවක සේවිකාවෝ ගින්නට කොටු වූහ. මියගිය පිරිසෙන් ඇතැමුන් ගින්නෙන් බේරීමට ඉහළ මහල්වල සිට බිමට පැන ඇතැයි පොලිසිය පවසයි. පිළිස්සුම් තුවාල ලැබූවන්ගෙන් කිහිප දෙනකුගේ තත්ත්වය බරපතළ බවත් මරණ සංඛ්‍යාව තවත් ඉහළ යා හැකි බවත් ඩකා රෝහල් ආරංචි මාර්ග පවසයි. සිද්ධියට හේතුව සම්බන්ධයෙන් තමා කිසිවක් නොදන්නා බව පැවසූ ඇඟලූම් කම්හලේ හිමිකරු කම්හල් පරිශ‍්‍රය අනාරක්ෂිත බවට එල්ල වූ චෝදනා ප‍්‍රතික්ෂේප කළේය. ගින්නට හේතුව මෙතෙක් අනාවරණය වී නැති අතර ගින්න නිවා දැමීමට ගිනි නිවන හමුදා භටයන්ට පැය පහක් ගත වී ඇත. ගින්නට හේතුව කුමක්දැයි සෙවීමේ පරීක්ෂණ මේ වනවිට ආරම්භ කර ඇතැයි ද වාර්තා වේ. ගිනි නිවන භටයන් ගින්න නිවා දැමීමේ උත්සාහයක යෙදෙමින්...