ඔටුවකු සමග ඉතා සතුටින් උදේ ආහාරය ගන්නා පවුලක් බටහිර එංගලන්තයේ සිටියි. ඒ පියා නතාන් (34) මව චාලට් (31) සහ ඔවුන්ගේ පුතුන් දෙදෙනාය.

දිනපතා ඔවුන් ආහාර ගන්නා වෙලාවට පැමිණෙන ජෝ නැමැති ඔටුවා ජනේලයෙන් ඔළුව දමා ඔවුන්ගේ කෑම මේසයට පැමිණෙයි. ආරාධනයක් නොමැතිව ජෝ පැමිණි පළමු දිනයේ බය සිතුනත් ඔහුගෙන් කරදරයක් නැති බව දැන ගත් ඔවුන් දිනපතා ඔටුවාගේ ආහාරයත් කෑම මේසයටම ගෙන එයි.

පාන්, ධාන්‍ය හා පළතුරු ආහාරයට ගන්නා ජෝ චීස් සුවඳ එන විට නහය ජනේලයෙන් පිටතට ගනියි.

මේසයක ආහාර ගැනීමේ පුරුද්දක් නැති වුවත් ජෝ ඉතා විනීත අන්දමින් ආහාර ගන්නා බවත් කෑම ඉවර වූ පසු තව දෙන තෙක් බලා නොසිට එතැනින් ඉවත් වන බවත් නතාන් පැවසීය. ඒ නිසාම ඔටුවා නොදැනුවත්වම ඔවුන්ගේ පවුලේ සමාජිකයෙක් වී සිටියි.