(නාලක සංජීව දහනායක)

වර්තමානයේ ජනාධිපති ලේකම් කාර්යාලය පිහිටා තිබෙන පැරණි පාර්ලිමේන්තු ගොඩනැගිල්ල නැරඹීමේ අවස්ථාව මෙම සෙනසුරාදා (14) වැනිදා සිට මහජනතාවට ලබාදීමට රජය තීරණය කර ඇත.

ඒ අනුව සෑම සති අන්තයකම පෙරවරු 10.00 සිට පස්වරු 4.00 දක්වා මෙම ගොඩනැගිල්ල නැරඹීමේ හා ඡායාරූප ගැනීමේ අවස්ථාව මහජනතාවට හිමිවන බව ජනාධිපති ලේකම් කාර්යාලය සදහන් කරයි.

අධ්‍යක්‍ෂ ජනරාල් (පරිපාලන) නමට ලිපියක් යොමුකිරීම, 011-2441685 අංකයට ෆැකස් පණිවිඩයක් යොමුකිරීමෙන් හෝ 011-2354354 දුරකථන අංකය ඇමතීමෙන් පැරණි පාර්ලිමේන්තු ගොඩනැගිල් නැරඹිමට වේලාව වෙන්කරවාගත හැකිය.

මෙරට දේශපාලන ඉතිහාසයේ තීරණාත්මක යුගයක් නියෝජනය කරන පැරණි පාර්ලිමේන්තු ගොඩනැගිල්ල පැරණි ගෘහ නිර්මාණ ශෛලීන් පහෙන් එකක් වන අයෝනියානු ශෛලීයට අනුව නිර්මාණය කර ඇත.

වසර 82ට පෙර නිර්මාණය කර ඇති මෙම ගොඩනැගිල්ල බාහිර පෙනුමින් අතෑන්ස් හි ඇක්‍රොපොලීස් කඳු මුදුනේ ‘ඇතීනා’ නම් ග‍්‍රීක දෙවඟන වෙනුවෙන් ඉදිකර ඇති ප‍්‍රධාන දෙව්මැදුර වන පාතිනන් ගොඩනැගිල්ලට සමාන අන්දමින් ඉදිකර තිබේ.

ශ්‍රීමත් හර්බට් ස්ටැන්ලි ආණ්ඩුකාරවරයා විසින් 1930 ජනවාරි 29 වැනිදා ව්‍යවස්ථාදායක සභාව ලෙස මෙම ගොඩනැඟිල්ල ස්ථාපනය කර තිබේ. ව්‍යවස්ථා ප‍්‍රතිසංස්කරණ සහ ව්‍යවස්ථාදායකයේ පසුව සිදුවු නාම සංශෝධන සමඟ මෙය (1931-1947) රාජ්‍ය මණ්ත‍්‍රණ සභාව, (1947-1972) නියෝජිත මන්ත‍්‍රී මණ්ඩලය, (1972 – 1978) ජාතික රාජ්‍ය සභාව (1978 -1982) ශ්‍රී ලංකා පාර්ලිමේන්තුව යන  නම්වලින් හඳුන්වා ඇත.

පාර්ලිමේන්තුව ශ්‍රී ජයවර්ධනපුර කෝට්ටේ වෙත ගෙන යාමෙන් පසුව 1983 සැප්තැම්බර් 8 වැනිදා සිට මෙම ගොඩනැගිල්ල ජනාධිපති ලේකම් කාර්යාලය ලෙස නම් කරනු ලැබීය.