(බිඟුන් මේනක ගමගේ)

විල්පත්තු ජාතික වන උද්‍යානයේ දකුණු මායිමේ ස්වාරක්ෂිත කලාපයේ අක්කර 1500 ක කෝමාරිකා වගාවක් සඳහා යැයි කියමින් අනවසරයෙන් එළිපෙහෙළි කර සංවර්ධන කටයුතු කර ඇතැයි පරිසරවේදීහු චෝදනා කරති.

ජාතික වන උද්‍යානයේ දකුණු මායිමේ රාජාංගණය යාය 18 ප්‍රදේශයේ ඕරා ලංකා නමැති පෞද්ගලික සමාගමක් විසින් මෙම එළි පෙහෙළි කරනු ලැබ ඇතැයි ද ඔවුහු චෝදනා කරති.

වන සත්ව හා වෘක්ෂලතා ආරක්ෂණ ආඥා පනතත් වන ජීවී සංරක්ෂණ ආඥා පනතත් උල්ලංඝනය වන අයුරින් මෙම කටයුතු සිදුවන නමුත් වනජීවී සංරක්ෂණ දෙපාර්තමේන්තුව හෝ වන සංරක්ෂණ දෙපාර්තමේන්තුව ඊට එරෙහිව නීතිමය පියවර ගෙන නැතැයි ද පරිසරවේදීහු චෝදනා කරති.

අදාළ සංවර්ධන ව්‍යාපෘතිය සම්බන්ධයෙන් ඕරා ලංකා ආයතනය වෙනුවෙන් අන්තර්ජාලයට නිකුත් කර ඇති වීඩියෝවක අක්කර 1500 ක කෝමාරිකා පැල තවානක් දැමීමට මෙම එළි පෙහෙළිය සිදුවන්නේ යැයි ද ඒ යටතේ මුළු දිවයින පුරාම අක්කර ලක්ෂයක කෝමාරිකා වගාවක් කෙරෙන්නේ යැයි ද සඳහන් වේ.

මෙම කෝමාරිකා ව්‍යාපෘතිය සඳහා ඇමෙරිකානු ඩොලර් මිලියන 370 ක් මුදලක් ආයෝජනය කෙරෙන්නේ යැයි ද කාබනික වගාවක් හැටියට කෙරෙන නිෂ්පාදනය මුළුමනින්ම යුරෝපා වෙළෙඳපොල ඉලක්ක කරගන්නේ යැයි ද එහි සඳහන් වේ.

වන සත්ව හා වෘක්ෂලතා ආරක්ෂණ ආඥා පනතට අනුව ස්වාභාවික රක්ෂිත ප්‍රදේශයක මායිමෙන් සැතපුමක් දුර ඇතුළත කෙරෙන සංවර්ධන කටයුත්තකදී වන ජීවී අධ්‍යක්ෂ ජනරාල්වරයාගෙන් ලිඛිත අවසරයක් ගත යුතු වුවද මෙම ව්‍යාපෘතිය සඳහා එවැනි අවසරයක් ගෙන නැතැයි එම දෙපාර්තමේන්තුවේ ජ්‍යෙෂ්ඨ නිලධාරියෙක් පැවැසීය.

මේ ගැන රාජාංගණය ප්‍රාදේශීය ලේකම්වරයාගෙන් විමසීමට උත්සාහ කළ ද ඔහු දුරකථනයට ප්‍රතිචාර නොදැක් වූ අතර එම කාර්යාලයේ දුරකථන අංක පහෙන් තුනක්ම භාවිතයේ නැති බවට ප්‍රතිචාර දැක්විණි.