(කෑගල්ල අධිකරණ චමින්ද වැවතැන්න)

සිය බිරිඳගේ බාල අවිවාහක සහෝදරියට මනමාලයකු සොයා දිය හැකි බව පවසා ඇයට අපූරු යෝජනාවක් කර ඇතැයි කියන පුද්ගලයකු පිළිබඳව කෑගල්ල ප්‍රදේශයේ ග්‍රාමයකින් වාර්තාවිය. වාර්තා වන අන්දමට සිද්ධිය මෙසේය.

ලිංගික අල්ලස ඉල්ලා ඇත්තේ 34 හැවිරිදි දෙදරු පියෙකි. ඔහු විවාහ වී ඇත්තේ රත්නපුරයේ කතක සමගිනි. බිරියට වැඩිමහල් සහෝදරයකු හා බාල සහෝදරියක සිටින අතර වැඩිමහල් සහෝදරයා විවාහ වී මව්පියන් සමග මහ ගෙදර නිවසේ පදිංචිව සිටී. ඔවුන් සමග පදිංචිව සිටින බාල සහෝදරියට අවුරුදු 25කි. උපාධිධාරිනියක වන ඇයද රැකියාවක් අපේක්ෂිතව නිවසේ කල් ගෙවමින් සිටී.

මීට මාස දෙකකට පමණ ඉහතදී එකී පුද්ගලයා බිරිඳ හා දරුවන් දෙදෙනා සමග ත්‍රීරෝද රථයෙන් රත්නපුරයේ බිරිඳගේ මහ ගෙදර ගියේ නැන්දා මාමාගේ සුවදුක් විමසා බැලීමටය. එහිදී බිරිඳගේ මව බෑනාට ප්‍රකාශ කර ඇත්තේ “පුතේ පුතා වගේ හැම දේම කල්පනා කර වැඩ කරගන්නා පිරිමි දරුවෙක් කැගල්ල පැත්තෙන් බාල දුවට හොයලා දෙන්න බලන්නකො” කියාය. “හරි අම්මේ මම සුදු නංගිට කෑගල්ල පැත්තෙන් හොද කොල්ලෙක් ඉක්මනටම හොයලා දෙන්නම්” යනුවෙන් බෑනාද නැන්දම්මාගේ සිත සතුටු කරවමින් ප්‍රකාශ කළේය. දින දෙකක් රත්නපුර නිවසේ සිට මෙම පිරිස යළි කෑගල්ලේ නිවසට පැමිණියේ බිරිඳගේ බාල අවිවාහක නැගණියගේ ජංගම දුරකතනයේ අංකය ද ඉල්ලා ගනිමින්ය. ගෙවී ගියේ දින කිහිපයකි.

දිනක් බිරිඳගේ නැගණියගේ දුරකතනයට ඇමතුමක් ගත් එකී පුද්ගලයා කියා සිටියේ “නංගි ඔයාට ගැළපෙන හොඳ කොල්ලෙක් මම වරකාපොළ පැත්තෙන් හෙව්වා. ඌ දැනට රජයේ රැකියාවකුත් කරනවා. පවුල් පසුබිමත් හොඳටම හොඳයි. කොල්ලත් ලස්සනයි. අරක්කු සිගරැට් බොන්නෙත් නෑ යනුවෙනි. “හා අයියේ එයාගේ ඡායාරූපයක් ඉල්ලා අම්මට එවන්නකෝ අපිට බලන්න” ඇයද මස්සිනාට පැවසුවාය. “නංගි මම ඒ වැඬේ ඉක්මනටම කරන්නම් හැබැයි මේ කතාව ඔයා කවුරුවත් සමඟ කියන්න එපා. කිවුවොත් මම ඔයාට ඒ කොල්ලා සම්බන්ධ කරලා දෙන්නේ නෑ” යනුවෙන් එම පුද්ගලයා ප්‍රකාශ කළේ මහා බලාපොරොත්තුවක් සිතෙහි ඇති කර ගනිමින්ය.

කියන්නකෝ අයියේ මොකක්ද කියලා ඇය පැවසුවිට ඔහු කිවේ නංගී මම ඔයාට ගොඩක් ආදරෙයි. ඔයා ඇසුරුකරන්න කැමතියි කියාය. “අයියේ ඒවට නම් එන්න එපා මම මේ ගැන අක්කා සමඟ කියනවා” යැයි පවසා දුරකතන සම්බන්ධතාව විසන්ධි කළාය. එදින සවස එකී පුද්ගලයාගේ බිරිඳගේ දුරකථනයට ඇමතුමක් ගත් රත්නපුරයේ බාල සහෝදරිය සිද්ධිය සම්බන්ධයෙන් අක්කාට සියල්ල ප්‍රකාශ කළාය. එදින සිට මේ දක්වා දෙදෙනා අතර සිද්ධිය මුල් කරගෙන ගැටුම් පවතින බවත් පවුල් ජීවිතයද දිනෙන් දින කඩා වැටෙමින් පවතින බවත් අනාවරණය විය.